پاکستان نے بنگلہ دیش کیخلاف ٹیسٹ سیریز کیلئے اسکواڈ کا اعلان کر دیا

راولپنڈی: پاکستان کرکٹ بورڈ (پی سی بی) نے بنگلہ دیش کے خلاف دو میچوں کی ٹیسٹ سیریز کے لیے 17 رکنی اسکواڈ کا اعلان کر دیا ہے۔ شان مسعود کو ٹیم کا کپتان جبکہ سعود شکیل کو نائب کپتان مقرر کیا گیا ہے۔

پی سی بی کے جاری کردہ بیان کے مطابق، سعود شکیل کو شاہین شاہ آفریدی کی جگہ نائب کپتان بنایا گیا ہے۔ یہ جیسن گلیسپی کا ریڈ بال ہیڈ کوچ کی حیثیت سے پہلا ٹیسٹ سیریز ہوگا۔

اسکواڈ میں ڈومیسٹک کرکٹ میں شاندار کارکردگی کی بنیاد پر محمد ہریرہ، کامران غلام اور محمد علی کو بھی شامل کیا گیا ہے۔

17 رکنی سکواڈ میں عبداللہ شفیق، ابرار احمد، بابر اعظم، کامران غلام، خرم شہزاد، میر حمزہ، محمد علی، محمد ہریرہ، محمد رضوان، نسیم شاہ، صائم ایوب، سلمان علی آغا، سرفراز احمد اور شاہین شاہ آفریدی شامل ہیں۔

پاکستان ٹیسٹ ٹیم کا کیمپ 11 اگست سے راولپنڈی میں شروع ہوگا جس کی نگرانی ہیڈ کوچ جیسن گلیسپی اور اسسٹنٹ کوچ اظہر محمود کریں گے۔ بنگلہ دیش کرکٹ ٹیم 17 اگست کو اسلام آباد پہنچے گی۔

سیریز کا پہلا ٹیسٹ میچ 21 سے 25 اگست تک راولپنڈی کرکٹ اسٹیڈیم میں کھیلا جائے گا جبکہ دوسرا ٹیسٹ کراچی میں 30 اگست سے 3 ستمبر تک ہوگا۔