اسلام آباد میں عالمی معیار کا چڑیا گھر اور سفاری پارک بنانے کی منظوری

اسلام آباد: اسلام آباد میں شہریوں کو عالمی معیار کی تفریحی سہولتیں فراہم کرنے کے لیے ایک بڑی خوشخبری سامنے آئی ہے۔ وفاقی وزیر داخلہ محسن نقوی کی زیر صدارت سی ڈی اے ہیڈکوارٹر میں ہونے والے اجلاس میں اسلام آباد میں عالمی معیار کا چڑیا گھر اور سفاری پارک بنانے کی منظوری دے دی گئی ہے۔

چیئرمین سی ڈی اے نے اجلاس میں چڑیا گھر اور سفاری پارک کے قیام کے پراجیکٹ پر تفصیلی بریفنگ دی۔ وزیر داخلہ نے اس پراجیکٹ کو بہت اہم قرار دیتے ہوئے اس کی اصولی منظوری دے دی۔

اعلامیے کے مطابق چڑیا گھر اور سفاری پارک 200 ایکڑ پر بنایا جائے گا۔یہاں 5 ہزار سے زائد جانور اور پرندے رکھے جائیں گے۔سفاری پارک کو ورلڈ ایسوسی ایشن آف زو اینڈ ایکوریم سے رجسٹر کرایا جائے گا۔

اعلامیے میں مزید کہا گیا کہ اکتوبر میں چڑیا گھر اور سفاری پارک کا سنگ بنیاد رکھا جائے گا۔

وزیر داخلہ محسن نقوی کا کہنا ہے کہ یہ پراجیکٹ اسلام آباد کی سیاحت کو فروغ دے گا۔ شہریوں کو تفریح کے لیے ایک نئی جگہ ملے گی۔