لاہور : حضرت علی ہجویری داتا گنج بخش کے 981ویں سالانہ عرس کے موقع پر لاہور پولیس نے شہر میں فول پروف سکیورٹی کے انتظامات کیے ہیں۔ عرس کے موقع پر لاکھوں زائرین کی آمد کی توقع ہے جس کے پیش نظر پولیس نے شہر کے داخلی اور خارجی راستوں پر ناکہ بندی کر کے سکیورٹی کے سخت اقدامات اٹھائے ہیں۔

پولیس کے مطابق عرس کے دوران شہر میں 6 ایس پیز، 22 ڈی ایس پیز سمیت 4 ہزار سے زائد پولیس اہلکار سکیورٹی کے فرائض سرانجام دیں گے۔ خواتین زائرین کی چیکنگ کے لیے خواتین پولیس اہلکار بھی تعینات کی گئی ہیں۔ اس کے علاوہ شہر میں 81 ناکہ جات، 9 چیک پوسٹس اور 12 واک تھرو گیٹس لگائے گئے ہیں۔

سی سی پی او لاہور بلال صدیق کمیانہ نے کہا ہے کہ داتا دربار میں داخل ہونے سے قبل ہر فرد کی مکمل تلاشی لی جائے گی تاکہ کسی بھی ناخوشگوار واقعے کو روکا جا سکے۔ انہوں نے کہا کہ شہر کے داخلی اور خارجی راستوں پر سیکیورٹی ہائی الرٹ رہے گی اور سینئر پولیس افسران خود بھی عرس کے انتظامات کا جائزہ لیں گے۔

سی سی پی او نے ہدایت کی ہے کہ دودھ کی سبیلوں اور لنگر کی تقسیم کے دوران بھی سیکیورٹی کا خاص خیال رکھا جائے۔ انہوں نے کہا کہ سیکیورٹی کے پیش نظر مختص کردہ پارکنگ کے علاوہ کہیں بھی گاڑی کھڑی نہ کرنے دی جائے اور پولیس افسران مشکوک افراد پر کڑی نظر رکھیں۔

سی سی پی او نے شہریوں سے اپیل کی ہے کہ وہ سیکیورٹی فورسز کو تعاون دیں اور کسی بھی مشکوک چیز یا شخص کی اطلاع فوری طور پر پولیس کو دیں۔

لاہور : لاہور ایئرپورٹ پر کسٹم حکام نے ایک بڑی کارروائی کرتے ہوئے بیرون ملک سے آنے والے تین مسافروں کو گرفتار کر لیا ہے۔ ان مسافروں کے قبضے سے 100 سے زائد موبائل فون اور بھاری مالیت کے سونے کے زیورات برآمد کیے گئے ہیں جن کی مجموعی مالیت تقریباً 10 کروڑ روپے ہے۔

ذرائع کے مطابق گرفتار افراد بیرون ملک سے موبائل فون اور زیورات سمگل کرکے پاکستان میں فروخت کرتے تھے۔ کسٹم حکام کو ان کی حرکتوں پر کافی عرصے سے شک تھا، جس کے بعد انہیں لاہور ایئرپورٹ پر گرفتار کر لیا گیا۔

ابتدائی تحقیقات سے پتہ چلا ہے کہ یہ گروہ کافی عرصے سے یہ غیر قانونی کاروبار کر رہا تھا اور انہوں نے اس طرح کئی کروڑ روپے کی کمائی کی ہے۔

گرفتار افراد کو متعلقہ اداروں کے حوالے کر دیا گیا ہے اور ان سے مزید پوچھ گچھ کی جا رہی ہے۔ اس حوالے سے ایک مقدمہ بھی درج کر لیا گیا ہے۔

فوکٹ :تھائی لینڈ کے مشہور سیاحتی جزیرے فوکٹ میں گزشتہ ہفتے آنے والی شدید بارشوں کے باعث مٹی کا تودہ گرنے سے ایک روسی جوڑے سمیت 13 افراد ہلاک ہو گئے ہیں۔

فوکٹ کے گورنر سوفون سوانارت کے مطابق یہ حادثہ مشہور سیاحتی مقام بگ بدھا کے قریب پیش آیا۔ مٹی کے تودے گرنے سے تقریباً 20 افراد زخمی بھی ہوئے اور 209 گھر متاثر ہوئے ہیں۔

مرنے والوں میں ایک روسی جوڑے کے علاوہ میانمار کے 9 تارکین وطن مزدور اور 2 تھائی باشندے شامل ہیں۔

حادثے کے بعد سے ہی ریسکیو آپریشن جاری ہے۔ متاثرہ علاقے میں صفائی کا کام کیا جا رہا ہے اور ملبے تلے دبے ہوئے افراد کو نکالنے کی کوشش کی جا رہی ہے۔

حکام متاثرین کے خاندانوں اور سفارت خانوں سے رابطے میں ہیں۔ انہوں نے متاثرین کو ہر ممکن مدد کا یقین دلایا ہے۔