یونیورسٹی آف ایجوکیشن کے پرو وائس چانسلر کو عہدے سے برطرف

لاہور : پنجاب کے گورنر نے یونیورسٹی آف ایجوکیشن کے پرو وائس چانسلر کو عہدے سے برطرف کر دیا ہے۔ اس کے علاوہ پروفیسر عالم سعید سے وائس چانسلر کا اضافی چارج بھی واپس لے لیا گیا ہے۔

اس فیصلے کے بعد ہائر ایجوکیشن ڈیپارٹمنٹ نے نوٹیفکیشن جاری کر دیا۔ ننکانہ صاحب یونیورسٹی کے وائس چانسلر ڈاکٹر محمد افضل کو یونیورسٹی آف ایجوکیشن کا اضافی چارج سونپ دیا گیا ہے۔ وہ ایک باقاعدہ وائس چانسلر کی تعیناتی تک اس عہدے پر فائز رہیں گے۔

پروفیسر عالم سعید یونیورسٹی میں شعبہ ڈویژن آف سائنس اینڈ ٹیکنالوجی کے ڈائریکٹر بھی ہیں۔ وائس چانسلر کے خلاف یہ کارروائی سیکشن 13/9 اور 10/7 کے تحت کی گئی ہے۔

اس برطرفی پر ردعمل دیتے ہوئے پروفیسر عالم سعید نے کہا ہے کہ اس طرح کا کوئی سلوک ایک نائب قاصد کے ساتھ بھی نہیں کیا جاتا۔ ان کا کہنا ہے کہ انہیں ابھی تک یہ واضح نہیں ہے کہ انہیں عہدے سے کیوں ہٹایا گیا ہے۔