معروف شاعر اجمل سراج طویل علالت کے بعد کراچی میں انتقال کر گئے

کراچی : پاکستان کے نامور شاعر اجمل سراج طویل علالت کے بعد کراچی میں انتقال کر گئے ہیں۔ اہل خانہ کے مطابق ان کا انتقال نجی ہسپتال میں ہوا۔ 56 سالہ اجمل سراج پھیپھڑوں کے عارضے میں مبتلا تھے۔

اجمل سراج کی نماز جنازہ آج بعد نماز عصر طیبہ مسجد زمان ٹاؤن کورنگی میں ادا کی جائے گی۔ ان کی وفات سے اردو ادب کو ناقابل تلافی نقصان پہنچا ہے۔

کراچی میں پیدا ہونے والے اجمل سراج نے کراچی یونیورسٹی سے ماسٹرز کی ڈگری حاصل کی اور کافی عرصے تک روزنامہ جسارت کے ہفتہ وار جریدے کے مدیر کے طور پر فرائض انجام دیے۔ انہوں نے اپنی شاعری کے ذریعے کراچی کی زندگی اور مسائل کو خوبصورت انداز میں بیان کیا۔ 

ان کی شاعری کا پہلا مجموعہ ’’اور میں سوچتا رہا‘‘ 2005 میں شائع ہوا جسے 2010 میں آرٹس کونسل آف پاکستان، کراچی نے دوبارہ شائع کیا۔ ان کی شاعری میں زندگی کے مختلف پہلوؤں کو خوبصورت انداز میں بیان کیا گیا ہے۔ ان کی شاعری میں سادگی اور روانی کی وجہ سے وہ نوجوان نسل کے درمیان بھی بہت مقبول تھے۔