بدنظمی اور نا اہلی پر الیکشن کمشنر سندھ سمیت 3 افسران معطل

اسلام آباد:  چیف الیکشن کمشنر سکندر سلطان راجا نے نااہلی اور بدنظمی پر الیکشن کمیشن کے 3 افسران کو معطل کر دیا۔

الیکشن کمیشن کے جاری کردہ نوٹیفکیشن کے مطابق صوبائی الیکشن کمشنر سندھ شریف اللہ، ڈائریکٹر ایڈمن الیکشن کمیشن سندھ اظہرحسین ٹنواری اور الیکشن افسر کراچی خدا بخش کو نااہلی اور بدنظمی پر 3 مہینوں کے لئے معطل کر دیا گیا ہے۔

نوٹیفکیشن میں کہا گیا ہے کہ معطل کیے گئے افسران کو انکوائری مکمل ہونے تک کراچی میں رہنا ہوگا۔ ان کی جگہ جوائنٹ صوبائی الیکشن کمشنر علی اصغر سیال کو قائم مقام الیکشن کمشنر سندھ تعینات کر دیا گیا ہے۔

الیکشن کمیشن کا کہنا ہے کہ 17 ستمبرکی رات پپری کراچی میں اسٹرانگ روم کے تالوں کو زبردستی توڑ کر مختلف پولنگ اسٹیشنزکے کئی بیگز کو نقصان پہنچایا گیا ۔

الیکشن کمیشن نے اس واقعے کی تحقیقات کے لیے ایک کمیٹی بھی تشکیل دی ہے۔ اس کمیٹی میں جوائنٹ صوبائی الیکشن کمشنر سندھ نذر عباس، ڈائریکٹر وسیم احمد اور آر ای سی لاڑکانہ عبدالوحید شامل ہیں۔ کمیٹی کو تین دن کے اندر اپنی رپورٹ جمع کرنا ہے۔