ایسی کسی ترمیم کا حصہ نہیں بنیں گے جو بنیادی حقوق کے منافی ہو، مولانا عبدالغفور حیدری

جمعیت علماء اسلام (ف) کے مرکزی سیکرٹری جنرل مولانا عبدالغفور حیدری کا کہنا ہے کہ جے یو آئی ایسی کسی ترمیم کا حصہ نہیں بنے گی جو بنیادی حقوق کے منافی ہو۔

مولانا عبدالغفور حیدری نے کراچی میں میڈیا سے گفتگو کرتے ہوئے کہا کہ آئینی ترامیم پر جے یو آئی نے اپنا واضح مؤقف دیا ہے، ہم نے پوری قوم کو مشکل سے بچا لیا ہے۔آئین کو کھیل نہ بنایا جائے، اگر ترمیم کرنی ہے تو تقاضے بھی پورے کریں، آئین میں آرڈیننس کی کوئی اہمیت نہیں اور اسے صرف وقتی طور پر استعمال کیا جا سکتا ہے۔

عبدالغفور حیدری نے کہا کہ بلوچستان میں دو نوجوان پوری قومی شاہراہ بند کر دیتے ہیں، بلوچستان کے حالات اس نہج پر کیسے پہنچے؟ بلوچستان کے وسائل پر وفاق نے قبضہ کیا ہوا ہے، بلوچستان میں طاقت کا استعمال کیا جائے گا تو مزید خرابیاں پیدا ہوں گی، طاقت کےذریعے بلوچستان کا مسئلہ حل نہیں ہو سکتا، خیبر پختونخوا اور بلوچستان میں سنجیدہ مطالبات کو دیکھ کرانہیں حل کیا جائے۔

مولانا عبدالغفور حیدری نے کہا کہ کچے کا چھوٹا سا علاقہ ہے مگر آئے دن لوگوں کو اغوا کیا جاتا ہے، ان علاقوں میں کہیں بھی حکومت کی رٹ دکھائی نہیں دے رہی۔ حکومتی عہدیدار اعتراف کرچکے ہیں کہ حکومت نہیں چل رہی، یہ حکومت مزید نہیں چل سکتی اس لیے فوری طور پر صاف شفاف انتخابات کرائے جائیں۔