صہیونی فوجیوں کا غزہ سٹی میں الجزیرہ کے دفتر پر دھاوا، عملے کو نکل جانے کا حکم

صہیونی فوجیوں نے ہفتے کو رات گئے غزہ سٹی میں قطر کے میڈیا آؤٹ لیڈ الجزیرہ کے دفتر پر دھاوا بول کر عملے کو ہراساں کیا اور کیمرے، کمپیٹر اور دیگر سامان لے کر وہاں سے نکل جانے کا حکم دیا۔

غیر ملکی خبر رساں ادارے کے مطابق نقاب پوش اسرائیلی فوجی لائیو ٹرانسمیشن کے دوران الجزیرہ کے دفتر میں گھس آئے اور ٹرانسمیشن رکوادی۔ غزہ میں الجزیرہ کے دفتر پر اسرائیلیوں فوجیوں نے پہلے بھی حملہ کیا تھا۔

الجزیرہ کے مطابق اسرائیلی فوج کی جانب سے زبردستی چینل کے بیورو کو 45 روز کیلئے بند کرنے کا حکم دیا گیا ہے۔

دوسری طرف الجزیرہ نے دفتر پر اسرائیلی مسلح حملے کی مذمت کی ہے اور غزہ اور مقبوضہ فلسطینی علاقوں کی کوریج جاری رکھنے کے عزم کا اظہار کیا ہے۔

غزہ میں خواتین اور بچوں کے لیے محفوظ ٹھکانوں کا کردار ادا کرنے اسکولوں پر اسرائیلی فوج کے حملے تیز ہوگئے ہیں۔ تازہ ترین حملوں میں 13 بچوں سمیت 30 افراد جاں بحق ہوئے ہیں۔

دوسری طرف اسرائیل کے وزیرِاعظم بنیامین نیتن یاہو نے کہا ہے کہ اسرائیلی فوج نے دو دن میں جو کچھ کیا ہے وہ حزب اللہ کے لیے ایک واضح پیغام ہے۔ اگر اُس نے یہ پیغام نہیں سمجھا ہے تو سمجھ جائے گی۔

یاد رہے کہ لبنان کی ایرانی حمایت یافتہ حزب اللہ ملیشیا نے گزشتہ روز اسرائیل کے اندر بہت دور تک راکٹ مارے تھے جس کے نتیجے میں اسرائیل میں ایمرجنسی نافذ کرکے شہریوں کی نقل و حرکت محدود کردی گئی ہے۔