امریکی انتخابات:مختلف ریاستوں میں قبل از انتخابات ،ووٹنگ کا عمل جاری

امریکا میں صدارتی انتخاب 5 نومبر کو ہوں گے لیکن بزرگ شہریوں اور بیمار ووٹرز کو رش اور ہجوم سے بچانے کے لیے قبل از وقت ووٹنگ کا سلسلہ ابھی سے جاری ہے۔ جس کے پیش نظر امریکی ریاست ٹیکساس میں کئی مساجد میں پولنگ اسٹیشن قائم کیے گئے ہیں جس میں  پیش امام نمازیوں کو ووٹ کاسٹ کرنے کی ترغیب دے رہے ہیں۔

اس کے علاوہ امریکی ریاست مشی گن میں بھی 25 فیصد ووٹرز حق رائے دہی استعمال کر چکے، جارجیا میں اب تک 29 لاکھ افراد ووٹ ڈال چکے، شمالی کیرولائنا میں 26 فیصد ووٹرز نے ووٹ کاسٹ کر دیا۔

سوئنگ سٹیٹس  میں ری پبلکن امیدوار ٹرمپ کا پلڑا بھاری ہے،  جبکہ قومی سطح پر کملا ہیرس کو ٹرمپ پر ایک فیصد کی برتری حاصل ہے، اب تک 4 کروڑ 30 لاکھ سے زیادہ شہری قبل ازوقت ووٹ کاسٹ کر چکے۔

خیال رہے کہ غزہ اور لبنان میں اسرائیلی جارحیت کے پیش نظر اس بارامریکی  صدارتی الیکشن میں کانٹے کا مقابلہ متوقع ہے۔ جس کے باعث مسلم ووٹرز کی اہمیت کافی بڑھ گئی ہے۔

امریکا غزہ پرہونے والی اسرائیلی جارحیت کی حمایت پر مسلم ووٹرز کے ایک گروپ نے اس بار کسی کو بھی امیدوار کو  ووٹ نہ دینے کا فیصلہ کیا ہے۔

مختلف عوامی پولز میں کیے گئے سروے کے مطابق  مسلمان ووٹرز کا کہنا تھا کہ اسرائیل کے خلاف دو ٹوک مؤقف اختیار کرنے اور مذمت کرنے والے امیدوار کو ووٹ دیں گے۔

واضح رہے کہ کچھ روز قبل امریکی ریاست مشی گن میں علما اور پیش اماموں نے سابق امریکی صدر اور ری پبلکن امیدوار ڈونلڈ ٹرمپ کی حمایت کا اعلان کیا تھا جس پر ٹرمپ نے مسلم کمیونٹی کا شکریہ ادا کیا۔

دوسری جانب دیگر ریاستوں سے مقامی مسلم رہنماؤں نے کملا ہیرس کو اپنی حمایت کی یقین دہانی کرانی ہے۔