پی ایس ایل فائنل سے قبل پشاور زلمی کو بڑا جھٹکا ، دوکھلاڑی معطل

تفصیلات کے مطابق  پشاور زلمی کے حیدر علی اور عمید آصف کو آج  پی ایس ایل ایونٹ کے  فائنل میں شرکت کی اجازت نہیں ہوگی۔ دونوں کھلاڑیوں نے نہ صرف ببل کے باہر موجود افراد سے ملاقات کی بلکہ وہ ان افراد سے مقررہ سماجی فاصلہ برقرار رکھنے میں ناکام رہے ۔ پی سی بی کے مطابق دونوں نے  سپر لیگ کے مقررہ پروٹوکولز کی خلاف ورزی کا اعتراف کیا ہے۔

علاوہ ازیں بائیو سیکیور ببل کی خلاف ورزی کرنے پر حیدر علی قومی کرکٹ ٹیم کے دورہ انگلینڈ اور ویسٹ انڈیز سے بھی باہر ہوگئے۔چیف سیلکٹر محمد وسیم نے کپتان بابر اعظم اور ہیڈ کوچ مصباح الحق سے مشاورت کے بعد صہیب مقصود کو حیدر علی کے متبادل کی حیثیت سے سکواڈ میں شامل کر لیا۔ صہیب مقصود اب دورہ انگلینڈ اور ویسٹ انڈیز میں حید علی کی جگہ قومی سکواڈ کا حصہ ہوں گے۔

خیال رہے کہ پاکستان سپر لیگ 6 کا فائنل آج ملتان سلطانز اور پشاور زلمی کے درمیان ابوظہبی  میں کھیلا جائے گا۔فیصلہ کن معرکہ پاکستانی وقت کے مطابق رات 9 بجے شروع ہوگا، ملتان سلطانز پہلی بار سپر لیگ کا فائنل کھیلے گی جبکہ پشاور زلمی چوتھی مرتبہ فائنل میں پہنچی ہے ۔ دونوں ٹیموں کے کھلاڑی میدان میں ایک دوسرے کومات دینے  کے لیے تیار ہیں جبکہ کپتان بھی ٹرافی  کیلئے پرجوش ہیں ۔ ملتان سلطانز کی ٹیم  محمد رضوان کی قیادت میں جبکہ  پشاور زلمی وہاب ریاض کی کپتانی میں میدان میں اترے گی ۔