لاہور میں آلودگی اور اسموگ کے ڈھیرے، آلودہ ترین شہروں میں آج بھی پہلے نمبر پر

باغوں کے شہر لاہور میں آلودگی اور اسموگ کے ڈھیرے، آلودہ ترین شہروں میں آج بھی پہلے نمبر پر موجود ہے۔

صوبائی دارالحکومت لاہور میں آج صبح کے وقت بھی اسموگ نے شہر میں اپنے پنجے گاڑ رکھے ہیں اور آلودہ ترین شہروں میں پہلے نمبر پر پے۔

لاہور میں اسموگ کی اوسط شرح خطرناک حد بھی پار کر گئی جس سے لاہور کا ایئر کوالٹی انڈیکس 778 تک پہنچ گیا، شہر میں گرین لاک ڈاؤن جاری ہے جبکہ دھواں پھیلانے والوں پر جرمانے عائد کرنے کا سلسلہ بھی جاری ہے۔ اس کے علاوہ ملتان اور پشاور میں بھی اسموگ میں خطرناک حد تک اضافہ ہوا ہے جس کی وجہ سے شہریوں کو سانس کے مسائل، آنکھوں میں جلن کی شکایات عام ہیں۔

فضائی آلودگی کے اعتبار سے بھارتی شہر دہلی کا دوسرا نمبر ہے، دہلی کا ایئر کوالٹی انڈیکس 511 کی حد کو چھو گیا ہے، بھارت میں فصلوں کی باقیات جلانے سے اٹھنے والا شدید دھواں پاکستان میں داخل ہو رہا ہے۔

پنجاب حکومت نے آج کے لیے الرٹ جاری کردیا ہے، شہریوں سے گھروں میں رہنے اور کھڑکی دروازے بند رکھنے کی اپیل کی گئی ہے جبکہ الرٹ میں کہا گیا ہے کہ آئندہ 48 گھنٹے اسموگ کی شدت برقرار رہے گی۔ادھر آلودگی سے متعلق امریکی خلائی ادارے ناسا نے بھی فضائی امیج جاری کر دیا جس میں دیکھا جاسکتا ہے کہ بھارتی علاقوں میں بڑے پیمانے پر فصل کی باقیات جلانے سے سموگ میں شدت آئی۔

سیکرٹری محمکہ تحفظ ماحولیات پنجاب راجہ جہانگیر انورنے کہا ہے کہ بھارت میں کثرت سے فصلوں کی باقیات کو جلانے سے آٸندہ 24 گھنٹوں میں لاہور کے ایئرکوالٹی انڈیکس میں اضافے کا احتمال ہے، ان آلودہ مشرقی ہواؤں سے لاہور کے مختلف علاقوں میں ایئرکوالٹی انڈیکس میں غیرمعمولی طور پر اضافہ ہوسکتا ہے۔

انہوں نے مزید کہا کہ اس وقت ہوا کی رفتار 4 کلو میٹر فی گھنٹہ ہے جس کے لاہور کی جانب چند گھنٹے مزید چلنے کا امکان ہے۔