دہشتگردی  کے خلاف جنگ میں پاکستان کی حمایت جاری رکھیں گے،چین

چینی وزرات خارجہ کے ترجمان لین جیان نے کہا ہے کہ پاکستان اور چین کے درمیان دو طرفہ تعلاقات کو کمزور کرنے کی کوششوں کو کامیاب نہیں ہونے دیں گے۔
چینی وزارت خارجہ کے ترجمان لین جیان نےاپنے ایک بیان میں کہا ہے کہ  چین دہشتگردی کے خلاف جنگ میں پاکستان کے ساتھ کھڑا ہے، اور دونوں ممالک  کے درمیان مختلف شعبوں میں تعاون جاری رہے گا،تعلقات خراب کرنے کی تمام کوششیں ناکام ہوں گی۔
چینی شہریوں پر حملے کے متعلق ایک سوال کے جواب میں ترجمان  کا کہنا تھا کہ پاکستان اور چین کے درمیان  باہمی تعلقات کو سبوتاژ کرنے والی تمام سازشوں کو ناکام بنانے اور دہشت گردوں کو کیفر کردار تک پہنچانے کا عزم اور صلاحیت رکھتے ہیں، دہشت گردی کا مقابلہ کرنا بین الاقوامی برادری کی مشترکہ ذمہ داری ہے۔
ترجمان کا مزیدکہنا تھا کہ چین پاکستان کی معاشی و سماجی ترقی اور لوگوں کے ذریعہ معاش کو بہتر بنانے کی حمایت جاری رکھے گا اور دونوں ممالک کے درمیان تمام شعبوں میں تعاون مضبوطی سے آگے بڑھائے گا تاکہ دونوں ممالک کے عوام کو فوائد پہنچائے جائیں۔