چیمئپنز  ٹرافی پر ڈیڈ لاک برقرار، آئی سی سی کا اجلاس ملتوی

چیمئپنز  ٹرافی کے معاملے پر پاکستان اور بھارت کے کرکٹ بورڈ  کے درمیان ڈیڈ لاک برقرار ہے، جس کی وجہ سے دونوں بورڈ نے فیصلے کے لیے مزید مہلت مانگ لی ہے۔

ذرائع کے مطابق چیمئپنز ٹرافی کے حوالے سے آئی سی سی کا آج ہونے والا اجلاس پھر ملتوی ہو گیا  ہے، دونوں بورڈ اپنی حکومتوں سے چیمپئنزٹرافی پر مشاورت کریں گے۔

ذرائع کے مطابق آئی سی سی بورڈ میٹنگ کا اگلا اجلاس  اتوار یا پیر کو ہونے کا امکان ہے،جبکہ پاکستان اپنے اصولی مؤقف پر قائم ہے اور وہ اس سے  پیچھے نہیں ہٹے گا، معاملہ نہ سلجھنے کی صورت میں ووٹنگ کروائی جائے گی۔

واضح رہے کہ کل ہونے والے اجلاس  میں چیمئپنز  ٹرافی کی میزبانی کا فیصلہ ہونا تھا تا ہم وہ اجلاس ملتوی کر دیا گیا تھا، اجلاس آج دوبارہ ہونا تھا مگر آج پھر اجلاس نہیں ہو سکا، میگا ایونٹ کے معاملے پر پی سی بی ہائبرڈ ماڈل سے مکمل انکار اور میزبانی کے موقف پر قائم ہے۔

پاکستان کو اگلے سال کے اوائل میں آئی سی سی چیمئپنز  ٹرافی کا انعقاد کرنا ہے جبکہ بھارت نے پاکستان کا دورہ کرنے سے سے انکار کر دیا ہے جس کے بعد ٹورنامنٹ کا شیڈول ابھی تک طے نہیں ہو سکا، بھارت نے  ٹورنامنٹ کے لیے ہائبرڈ موڈ کی حمایت کی ہے جسے پی سی بی کی جانب سے یکسر مسترد کر دیا ہے۔

اس سے قبل پاکستان کرکٹ بورڈ کی جانب سے بھارتی بورڈ اور آئی سی سی کو واضح کردیا گیا ہے کہ بغیر کسی ٹھوس وجہ کے پاکستان ٹورنامنٹ کو نیوٹرل وینیو پر نہیں لیکر جائے گا اور اگر آئی سی سی نے نیوٹرل وینیو پر جانے کا کہا تو پاکستان کبھی بھی بھارت جاکر نہیں کھیلے گا۔