شامی باغیوں نے صدر بشار الاسد کے محل پر قبضہ کرکے اپنا پرچم لہرا دیا

شامی باغیوں نے حلب شہر پر کنٹرول حاصل کرنے کے بعد صدر بشار الااسد کے محل پر بھی قبضہ کرلیا ہے۔

غیر ملکی  خبر رساں ادارے کے مطابق روسی اور شامی فورسز کی فضائی بمباری کے باوجود حلب میں مسلح جنگجوؤں کی پیش قدمی جاری ہے، اور وہ سیکیورٹی فورسز کو شکست دیتے ہوئے شامی صدر کے محل تک پہنچنے میں کامیاب ہو گئے ہیں، باغیوں نے  محل پر بھی قبضہ کرکے اپنا پرچم لہرا دیا اور اس فتح کی تصاویر سوشل میڈیا پر بھی وائرل کی گئیں۔

شامی باغیوں کی تنظیم ”حیات تحریر الشام“ (HTS) نےہفتے کو حلب شہر میں داخل ہونے کے بعد اس پر قابو پا لیا ہے، اور حکومتی حامی شامی افواج کو تقریباً گھیر لیا، جس کے نتیجے میں شامی دفاعی افواج کی کرد فورسز کو آنا پڑا، شامی فضائیہ کی مدد کے لیے روس نے 2016 کے بعد پہلی دفعہ شامی سر زمین پر فضائی حملے کیے ہیں۔

 حلب کا تقریباً پورا علاقہ اس وقت باغیوں کے کنٹرول  میں ہے، سوائے شہر کے شمال میں واقع چند کرد محلوں کے، جو اب بھی شامی افواج کے قبضے میں ہیں۔

دوسری جانب باغیوں اور شامی فورسز کے درمیان لڑائی میں اب تک 300 سے زائد افراد ہلاک ہو چکے ہیں جن میں عام شہری بھی شامل ہے،امریکا سمیت عالمی قوتوں اور مسلم ممالک نے بھی کشیدگی کے فوری خاتمے پر زور دیا ہے جب کہ اقوام متحدہ کی سلامتی کونسل کا ہنگامی اجلاس بھی طلب کرلیا گیا۔

واضح  رہے کہ شام میں طویل جنگ کا آغاز 2011 سے ہوا تھا اور ملک کے بڑے حصے پر باغیوں نے قبضہ کرلیا تھا، جس کے بعدشام نے اتحادی افواج  روس اور ایران کی مدد سے 2020 میں بغاوت کو کچلنے کا دعویٰ کرتے ہوئے کہا تھا کہ ملک سے داعش اور باغی جماعتوں کا کنٹرول واپس لے لیا۔