تیسرا ٹی 20: پاکستان نے زمبابوے کو جیت کے لیے 133 رنز کا ہد ف دے دیا

تیسرے ٹی 20 میچ میں پاکستان نے زمبابوے کو جیت  کے لیے 133 رنز کا ہد ف دے دیا۔

پاکستان کی جانب سے کپتان سلمان علی آغا نے 32، طیب طاہر 21 اور عرفات منہاس 22 رنز کے ساتھ نمایاں رہے۔ زمبابوے کے بلیسنگ مزربانی نے دو وکٹیں حاصل کیں۔

اس سے قبل پاکستان  نے زمبابوے کے خلاف ٹاس جیت کر پہلے بیٹنگ کرنے کا فیصلہ کیا جو اچھا ثابت نہ ہو سکا۔  زمبابوے کے بولرز کی نپی تلی بولنگ کے آگے قومی بیٹرز بڑا اسکور بنانے میں ناکام رہے۔

 ٹاس کے  موقع پر کپتان سلمان علی آغا کا کہنا تھا کہ ہم میچ جیت کر سیریز میں کلین سویپ کرنے کی کوشش کریں گے،پاکستان کو تین میچوں کی سیریز میں دو صفر کی برتری حاصل ہے۔
قومی ٹیم نے آج کے میچ کیلئے 4 تبدیلیاں کی ہیں، اس طرح پاکستان اپنے تمام کھلاڑیوں کو سیریز میں موقع دے گا۔

پاکستان کی جانب سے اسکواڈ  کا اعلان گزشتہ روز ہی کردیا گیا تھا، اوپنر صائم ایوب، فاسٹ باؤلر حارث رؤف، سپنر ابرار احمد اور عرفان خان نیازی کو آرام دیا گیا ہے۔

ٹیم میں کپتان سلمان علی آغا، عمیر بن یوسف، صاحبزادہ فرحان، عثمان خان، طیب طاہر شامل ہیں، قاسم اکرم، عارف منہاس، جہانداد خان، عباس آفریدی، محمد حسنین اور سفیان مقیم کو بھی ٹیم کا حصہ بنایا گیا ہے۔