جی ایچ کیوحملہ کیس:بانی پی ٹی آئی سمیت دیگر ملزمان پر فرد جرم عائد، راجہ بشارت اورعمر ایوب گرفتار

جی ایچ کیو حملہ کیس میں بانی پی ٹی آئی سمیت دیگر ملزمان پر فرد جرم عائد کر دی گئی۔

انسداد دہشت گردی عدالت کے جج امجد علی شاہ نے اڈیالہ جیل میں 9 مئی جی ایچ کیو حملہ کیس کی سماعت کی، جہاں بانی پی ٹی آئی اور شاہ محمود قریشی کو کمرہ عدالت میں پیش کیا گیا۔

سماعت کے موقع پر اپوزیشن لیڈر عمرایوب، شیخ رشید، فواد چوہدری، زرتاج گل اور راجہ بشارت سمیت دیگر ملزمان بھی پیش ہوئے۔

وکلاء کی جانب سے  دلائل مکمل ہونےکے بعد  جج امجد علی شاہ نے فرد جرم کمرہ عدالت میں پڑھ کر سنائی، بانی پی ٹی آئی کے علاوہ  شیخ رشید سمیت دیگر ملزمان پر بھی فرد جرم عائد کی گئی ہے۔

بانی پی ٹی آئی سمیت دیگر ملزمان نے صحت جرم سے انکار کیا ہے۔

سانحہ 9 مئی جی ایچ کیو حملہ کیس کا مقدمہ تھانہ آر اے بازار میں درج ہے،مقدمے میں بانی پی ٹی آئی سمیت 143 ملزمان نامزد ہیں۔ 23 ملزمان کو عدالت پہلے ہی اشتہاری قرار دے چکی ہے۔