آرمی چیف کی ’’کیمبرین پیٹرول مشق‘‘ میں گولڈ میڈل جیتنے پر پاک فوج کی ٹیم کو مبارکباد

چیف آف آرمی اسٹاف جنرل سید عاصم منیر نے برطانیہ میں منعقدہ ’’کیمبرین پیٹرول مشق‘‘ میں گولڈ میڈل حاصل کرنے والی پاک فوج کی ٹیم کو مبارکباد دی۔

آئی ایس پی آر کے مطابق ’’کیمبرین پیٹرول مشق‘‘ برطنایہ میں 4 سے 13 اکتوبر 2024 تک منعقد ہوئی جو دنیا کی مشکل ترین فوجی مشقوں میں شمار کی جاتی ہے، پاک فوج کی ٹیم سمیت اس سال 143 ٹیموں نے حصہ لیا۔

پاک فوج کے دستے نے غیر معمولی مہارت اور عزم کا مظاہرہ کرتے ہوئے چھٹی بار یہ اعزاز اپنے نام کیا۔ آرمی چیف نے ٹیم کی شاندار کارکردگی کو سراہتے ہوئے پاکستان کا نام عالمی سطح پر روشن کرنے پر انہیں مبارکباد دی۔

یہ مشق مڈ ویلز، برطانیہ کے سخت اور دشوار گزار پہاڑی علاقوں میں منعقد کی جاتی ہے جس میں جسمانی قوت برداشت، حکمت عملی اور ذہنی پختگی کو پرکھا جاتا ہے۔

کیمرین پیٹرول مشق ٹیم ورک، قیادت، خود نظم و ضبط، جرات اور سخت ترین آپریشنل حالات میں عزم کا عملی مظاہرہ کرنے کا ایک معیار سمجھی جاتی ہے۔