پنجاب میں ڈینگی وائرس بھی سر اُٹھانے لگا

جی این این کے مطابق پنجاب میں کورونا کے بعد ڈینگی کی وبا بھی سر اٹھانے لگی ،   محکمہ  صحت پنجاب  نے تصدیق کی  ہے کہ پنجاب میں ڈینگی سے 24 گھنٹوں کے دوران لاہور اور جھنگ میں ایک ایک مریض رپورٹ  ہوا ہے ۔24 گھنٹوں کے دوران  لاہور میں ڈینگی  کے 45 مشتبہ مریض رپورٹ ہوئے  ہیں ۔

محکمہ صحت کے مطابق رواں سال لاہور میں ڈینگی کے 23 کیسز سامنے آئے ہیں،  لاہور میں گزشتہ روز  549 مقامات سے لاروا پایا گیا جسے تلف کردیا گیا ہے۔

2019 میں پاکستا ن  میں ڈینگی کے 50ہزار سے زائد کیسز  کی تصدیق ہوئی   تھی ۔

پاکستان میں پہلی مرتبہ ڈینگی 1994 میں پھیلا جس کے بعد سے اب تک متعدد مرتبہ وبائی مرض کا پھیلاؤ سامنے آچکا ہے، گزشتہ 2 دہائیوں کے دوران پاکستان میں 2 مرتبہ ڈینگی کا مرض خطرناک حد تک پھیل گیا تھا۔

سال 2005 میں کراچی میں ڈینگی کے 6 ہزار کیسز سامنے آئے تھے اور 52 اموات ہوئیں جبکہ 2011 میں لاہور میں 21 ہزار افراد ڈینگی سے متاثرہ ہوئے جبکہ 350 افراد اس بیماری کے سبب  انتقال کر  گئے۔سال 2011 سے 2014 کے دوران ملک بھی کی لیبارٹریز میں ڈینگی کے 48 ہزار کیسز کی تصدیق کی گئی۔

خیال رہے کہ ڈینگی مچھر کے کاٹنے سے پھیلنے والی ایک بیماری ہے جس کے نتیجے میں مریض کے پلیلیٹس میں کمی واقع ہوجاتی ہے اور مریض میں خون جمنے کی صلاحیت کم ہوجاتی ہے جس کے باعث پلیٹلیٹس لگانے پڑتے ہیں۔ اگر ڈینگی کا بروقت علاج نہ کیا جائے تو ڈینگی بخار سے زندگی کو خطرہ بھی لاحق ہوسکتا ہے اور اس کے نتیجے میں خون بہنے، پلیٹلیٹس میں کمی اور خون کے خلیات ضائع ہونے لگتے ہیں یا بلڈ پریشر خطرناک حد تک گر جاتا ہے۔