پاکستان میں رواں سال ایم پاکس کا آٹھواں کیس رپورٹ

پاکستان میں سعودی عرب سے آنے والے ایک مسافر میں ایم پاکس کا سال کا آٹھواں کیس رپورٹ ہوگیا۔

بروز بدھ اسلام آباد ایئرپورٹ پر اترنے والے 30 سالہ مزدور میں بخار اور وائرس کی دیگر علامات ظاہر ہوئیں۔ نیشنل انسٹی ٹیوٹ آف ہیلتھ کے ایک عہدیدار نے بتایا کہ مزدور کو پاکستان انسٹی ٹیوٹ آف میڈیکل سائنسز منتقل کیا گیا، جہاں ان میں ایم پاکس کے مثبت کیس کی تصدیق ہوئی۔ اپر دیر، خیبر پختونخوا کے رہائشی مریض کی خطرے سے باہر ہے اور انہیں آئسولیشن وارڈ میں داخل کردیا گیا ہے۔

ان کا کہنا تھا کہ ’ہم نے ان مسافروں سے رابطہ کرنا شروع کر دیا ہے جو مریض کے قریب بیٹھے تھے مزید برآں سعودی عرب کو بھی ان لوگوں کا سراغ لگانے کے لیے مطلع کیا گیا ہے جہاں مزدور رہائش پذیر اور کام کرتا تھا۔

واضح رہے کہ اب تک پاکستان میں ایم پاکس کے تمام کیسز بیرون ملک سے آنے والے مسافروں میں پائے گئے ہیں۔ حکام کے مطابق اب تک وائرس کی مقامی سطح پر منتقلی کا کوئی کیس سامنے نہیں آیا ہے۔