امریکہ کا اعلیٰ سطحی  وفد ہیئت التحریر کے رہنماؤں سے ملاقات کیلئے شام پہنچ گیا

دمشق: امریکہ کا اعلیٰ عہدیداروں پر مشتمل وفدہیئت التحریر کے رہنماؤں سے ملاقات کرنے کے لیے شام پہنچ گیا، 

غیر ملکی میڈیا کے مطابق امریکی وفد 3 اعلیٰ عہدیداروں پر مشتمل ہے جو آج شامی دارالحکومت دمشق پہنچا ہے وفد  بشار الاسد حکومت کا تختہ الٹنے والی تنظیم ہیئت التحریر الشام کے رہنماؤں سے ملاقات کرے گا۔ 

 امریکی محکمہ خارجہ کے ترجمان  کا کہناہے ملاقات کے دوران شام میں  اقتدارکی منتقلی سمیت دیگرامورپربات چیت ہوگی،انہوں نے مزید کہا کہ امریکی وفد شامی سول سوسائٹی اور دیگرکمیونٹیز کے ارکان سے بھی ملاقات کریگا جبکہ شام میں لاپتہ امریکیوں سے متعلق معلومات بھی حاصل کرنےکے لیے کام کرےگا۔ 

ترجمان امریکی محکمہ خارجہ کے مطابق وفد نئی شامی قیادت سے شام کے مستقبل کے متعلق ان کے ویژن کے بارے میں جاننے کی کوشش کرے گا اور یہ بھی پوچھے گا کہ امریکا کس طرح شام کی مدد کر سکتا ہے۔