غزہ :اسرائیلی فوج کا فلسطینی ٹی وی چینل کی گاڑی پرحملہ، 5 صحافی شہید

غزہ: اسرائیلی فوج نے غزہ کے ایک اسپتال میں کوریج کرنے والے صحافیوں کی گاڑی پر فضائی حملہ کیا جس کے نتیجے میں 5 فلسطینی صحافی شہید ہوگئے۔ 
غیر ملکی میڈیا کے مطابق اسرائیلی فوج نے نصیرات کیمپ میں واقع الاودا اسپتال میں کوریج کرنے والی القدس ٹی وی چینل کی وین پر فضائی حملہ کیا جس کے نتیجے میں  5 صحافیوں سمیت کم سے کم 10 فلسطینی شہید اور متعددزخمی ہوگئے۔ 
اسرائیلی حملے میں شہید ہونے والے صحافیوںمیںفادی حسونہ، ابراہیم الشیخ علی، محمد الدحا، فیصل ابوالقسام، ایمن الجدی شامل ہیں۔
رپورٹ کے مطابق حملے کے بعد براڈ کاسٹنگ وین میں آگ بھڑک اٹھی اور وین مکمل تباہ ہوگئی جس کی ویڈیوز سوشل میڈیا پر دیکھی جا سکتی ہیں۔ 
ڈوسری جانب اسرائیل نے مقبوضہ مغربی کنارے سے درجنوں فلسطینیو کوگرفتار کیا ہےجبکہ غزہ میں اسرائیلی بمباری بدستور جاری ہے ،گزشتہ  چوبیس گھنٹوں میںاسرائیل نے 27فلسطینیوں کو شہید کیا،شدید سردی میں جنوبی غزہ میں تین فلسطینی بچے ہائپو تھرمیا کا شکار ہو کر دم توڑ گئے۔
زیتون میں بھی بمباری سے بیس فلسطینی زخمی ہوئے، چوبیس گھنٹوں میں اسرائیلی حملوں میں فلسطینی شہدا کی تعداد ستائیس ہوگئی۔
اسرائیلی فوجیوں نے مقبوضہ مغربی کنارے کے المری مہاجر کیمپ میں چھاپے کے دوران درجنوں فلسطینیوں کو گرفتار کرلیا، اس دوران تین فلسطینیوں کو گولیاں مار کر زخمی بھی کیا گیام، جبکہ اسرائیلی فوج نے انڈونیشیا کے اسپتال کو ایک بار پھر خالی کرالیا۔ 
غزہ کی وزارت صحت کے مطابق پچھلے سال اکتوبر سے لے کر اب تک اسرائیلی بمباری سے45 ہزار افراد شہید ہو چکے ہیں جن میں اکثریت بچوںاور خواتین کی ہیں، جبکہ  ایک لاکھ تیس ہزار سے زائد افراد زخمی ہیں۔