کو ئٹہ : کوئلہ کان میں گیس دھماکے کے باعث 12 کان کن زیر زمین پھنس گئے

کوئٹہ کے علاقے سنجدی میں واقع کوئلہ کان میں گیس دھماکے کے باعث 12 کان کن زیر زمین پھنس گئے، جنہیں نکالنے کے لیے ریسکیو آپریشن شروع کر دیا گیا ہے۔

چیف مائنز آفیسر عبدالغنی بلوچ کے مطابق دھماکے کی شدت کے باعث کان کا اندرونی حصہ منہدم ہو چکا ہے، جس کے نتیجے میں مزدور کان کے اندر محصور ہو گئے ہیں ، چیف مائنز آفیسر نے مزید بتایا کہ یہ واقعہ تقریباً ایک گھنٹہ قبل پیش آیا، جس کی اطلاع موصول ہوتے ہی امدادی کارروائیاں شروع کر دی گئی ہیں۔

بلوچستان حکومت کے ترجمان شاہد رند کے مطابق ریسکیو ٹیمیں جائے حادثہ پر پہنچ چکی ہیں اور امدادی سرگرمیاں جاری ہیں۔

انہوں نے امید ظاہر کی کہ تمام کانکنوں کو بحفاظت نکالنے کی ہر ممکن کوشش کی جائے گی۔