بنگلہ دیش : سابق کپتان تمیم اقبال کا انٹرنیشنل کرکٹ سے ریٹائرمنٹ کا اعلان

ڈھاکہ: بنگلہ دیش کے سابق کپتان تمیم اقبال نے عالمی کرکٹ سے ریٹائرمنٹ کا اعلان کر دیا۔
سابق بنگلہ دیشی کپتا ن کا کہنا تھا کہ وہ طویل عرصے سے انٹرنیشنل کرکٹ سے دور ہیں، کسی کی توجہ کا مرکز نہیں بننا چاہتا جس وجہ سے ٹیم اپنی توجہ کھو دے۔
انہوں نے سوشل میڈیا پر اپنی ریٹائرمنٹ کا اعلان کرتے ہوئے کہا کہ کافی عرصے سے انٹرنیشنل کرکٹ سے دور رہا اور اب یہ میرے انٹرنیشنل کیریئر کا اختتام ہے، اس حوالے سے کافی عرصے سے سوچ رہا تھا۔
آئی سی سی  چیمپئنز ٹرافی کے حوالے سے گفتگو کرتے ہوئے ان کا کہنا تھا کہ اب جب چیمپئنز ٹرافی جیسا بڑا ایونٹ قریب ہے تو میں اپنے آپ کو ڈسکس نہیں کروانا چاہتا۔ 
سابق کپتان نے مزید کہا کہ انہوں نے  ایک لمبے عرصے سے بی سی بی کے سینٹرل کنٹریکٹ سے خود کو الگ کر لیا تھا، ریٹائرمنٹ یا کھیلنے کا فیصلہ کسی بھی ایتھلیٹ یا کرکٹر کا  ذاتی ہوتا ہے۔
انہوں نے کہا کہ سلیکشن کمیٹی نے بھی میری سلیکشن کے حوالے سے مجھ سے پوچھا مگر میں نے ریٹائرمنٹ کا فیصلہ کر لیا تھا، ان تمام افراد کا مجھے اتنا اہم سمجھنے پر شکریہ۔ انہوں نے اپنے فیصلے سے بنگلہ دیش کرکٹ بورڈ کے سلیکٹرز کو آگاہ کر دیا ہے۔
انہوں نے انٹرنیشنل کرکٹ سے دوسری بار ریٹائرمنٹ کا اعلان کیا ہے۔
واضح رہے کہ تمیم اقبال نے اس سے قبل جولائی  2023ءمیں ریٹائر ہونے کا اعلان کیا تھا لیکن چوبیس گھنٹے بعد ہی فیصلہ واپس لے لیا تھا۔