انٹرا پارٹی انتخابات کیس: الیکشن کمیشن نے پی ٹی آئی کو 11 فروری تک مہلت دے دی

اسلام آباد: الیکشن کمیشن آف پاکستان(ای سی پی) نے پاکستان تحریک انصاف کوانٹراپارٹی انتخابات کیس کے معاملے میں 11 فروری تک مہلت دے دی۔
الیکشن کمیشن آف پاکستان میں پی ٹی آئی  انٹرا پارٹی انتخابات کیس کی سماعت ہوئی، کیس کی سماعت چیف الیکشن کمشنر سکندر سلطان راجا کی سربراہی میں 3 رکنی کمیشن نے کی، جس میں پی ٹی آئی چیئرمین بیرسٹر گوہر الیکشن کمیشن میں پیش ہوئے۔
دوران سماعت چیف الیکشن کمشنر نے چیئرمین پی ٹی آئی سے مکالمہ کرتے ہوئے کہا کہ بیرسٹر صاحب یہ کیس 30 اپریل 2024 سے چل رہا ہے، پی ٹی آئی کی جانب سے تاحال تحریری جواب جمع نہیں کروایا گیا۔
چیف الیکشن کمشنر نے کہا کہ آپ نے پانچ درخواستوں اور نوٹس پر جواب جمع کروانا ہے۔ 
جس پر چئیر مین پی ٹی آئی بیرسڑ گوہر علی خان نے جواب دیتے ہوئے کہا کہ نوٹس کا جواب ہم دے چکے ہیں، درخواست گزاروں کی گزارشات کا جواب آئندہ سماعت پر جمع کروا دیں گے۔
دوران سماعت وکیل اکبر ایس بابر نے کہا کہ کیس کا فیصلہ ہونے تک پی ٹی آئی کے اکاؤنٹس منجمد کئے جائیں۔
بعد ازاں ا لیکشن کمیشن نے پی ٹی آئی کو آئندہ سماعت تک جواب جمع کرانے کی ہدایت کرتے ہوئے کیس کی سماعت 11 فروری تک ملتوی کردی۔