امریکا ڈاکٹر عافیہ صدیقی کو رہا نہ کر کے ہمیں ہماری اوقات دکھا رہا ہے،اسلام آباد ہائیکورٹ

اسلام آباد: اسلام آباد ہائیکورٹ کے جج جسٹس سردار اعجاز اسحاق نےڈاکٹر عافیہ صدیقی کے کیس میں ریمارکس دیتے ہوئے کہا ہے کہ ڈاکٹر عافیہ کو رہا نہ کر کے امریکا ہمیں ہماری اوقات دکھا رہا ہے۔
ڈاکٹر عافیہ صدیقی کیس کی سماعت اسلام آباد ہائیکورٹ میں ہوئی ، کیس کی سماعت ہائیکورٹ کے جسٹس سردار اعجاز اسحاق خان نے کی،دوران سماعت درخواست گزار ڈاکٹر فوزیہ صدیقی اور ان کے امریکی وکیل کلائیو اسمتھ ویڈیو لنک کے ذریعے عدالت میں پیش ہوئے، جبکہ اس مو قع پر وکیل درخواست گزار عمران شفیق اور ایڈیشنل اٹارنی جنرل بھی عدالت میں پیش ہوئے۔
دوران سماعت عدالت کو آگاہ کیا گیا کہ سابق امریکی صدر جوبائیڈن نے ڈاکٹر عافیہ صدیقی کی رحم کی اپیل مسترد کر دی ہے، امریکا نے پاکستان کے ساتھ قیدیوں کی رہائی کیلئے معاہدہ کرنے سے انکار کر دیا ہے۔
جس پر ہائیکورٹ کےجسٹس سردار اعجاز اسحاق نے ریمارکس دیتے ہوئے کہا کہ امریکا ہمیں ہماری اوقات دکھا رہا ہے، سابق امریکی صدر نے اپنے بیٹے کی سزا تو معاف کر دی لیکن ہمارے قیدی (عافیہ) کو رہا نہیں کیا۔
کیس کی سماعت کے دوران وزیراعظم اور وزیرِخارجہ کے بیرون ممالک دوروں کی تفصیلات پر مشتمل ایک رپورٹ بھی عدالت میں پیش کی گئی، وزارتِ خارجہ نے عدالتی سوالات کے جوابات پر مشتمل رپورٹ عدالت میں جمع کرائی۔
امریکا میں پاکستانی سفیر کی ڈاکٹر عافیہ صدیقی سے متعلق ملاقاتوں میں شرکت نہ کرنے پر بھی جواب جمع کرادیا گیا، عدالت نے کیس کی سماعت دو ہفتے کیلئے ملتوی کردی۔
واضح رہے کہ سابق امریکی صدر جو بائیڈن نے اپنی مدت صدارت کے آخری دنوں میں اپنے بیٹے سمیت کئی قیدیوں کی رہائی کے پروانے پر دستخط کیے تھے تاہم رحم کی اپیل کرنے کے باوجود جو بائیڈن نے ڈاکٹر عافیہ صدیقی کی رہائی کے پروانے پر دستخط نہ کیے۔