مراکش کے سفیر کی وزیر اعظم سے ملاقات

 مراکش کے سفیر محمد کرمون نے وزیراعظم پاکستان شہباز شریف سے ملاقات کی، جس دوران دونوں رہنماؤں نے دو طرفہ تعلقات اور باہمی مفادات پر بات چیت کی۔

وزیراعظم شہباز شریف نے دونوں ممالک کے تاریخی اور برادرانہ تعلقات کی اہمیت پر زور دیتے ہوئے کہا کہ پاکستان اور مراکش کے درمیان تجارت اور سرمایہ کاری کے شعبوں میں مزید تعاون کی ضرورت ہے۔

وزیراعظم نے مراکش کے حکام کی جانب سے دخیلہ کے ساحل پر کشتی الٹنے کے واقعے میں پاکستانیوں کو بچانے میں معاونت کو سراہا اور جاں بحق ہونے والے پاکستانیوں کے جسد خاکی کی واپسی میں تعاون پر شکریہ ادا کیا۔

مراکش کے سفیر محمد کرمون نے اس موقع پر پاکستان کے ساتھ مشترکہ مفادات کے تمام شعبوں میں تعاون کو مزید مضبوط کرنے کے عزم کا اعادہ کیا۔

انہوں نے دونوں ممالک کے عوام کے درمیان خیر سگالی کے روابط کو بھی اجاگر کیا اور عوامی سطح پر تعلقات کو مزید مستحکم کرنے پر زور دیا۔