ایران کےلیے جاسوسی کرنے والے دو اسرائیلی فوجی گرفتار 

تل ابیب :اسرائیلی پولیس نے ایران کے لیے جاسوسی کرنے والے دو اسرائیلی فوجیوں کو گرفتار کیا ہے۔
غیر ملکی میڈیا کے مطابق اسرائیل کی داخلی سکیورٹی ایجنسی شین بیت اور اسرائیلی پولیس نے اسرائیلی فوج کے 2 سابق ریزرو اہلکاروں کو گرفتار کیا ہے،گرفتار اہلکاروں پر پیسوں کے عوض ایران کے لیے جاسوسی کرنے کا الزام ہے۔
اسرائیلی پولیس کا کہنا ہے کہ شمالی اسرائیل سے تعلق رکھنے والے دونوں، یوری ایلیاسفوف اور جارجی آندرییف پر شبہ ہے کہ انہوں نے اسرائیلی آئرن ڈوم ایئر ڈیفنس سسٹم کے بارے میں خفیہ معلومات ایران کو منتقل کیں۔
پولیس حکام کے مطابق مرکزی ملزم یوری ایلیاسفوو اسرائیلی فوج کے آئرن ڈوم ائیر ڈیفنس یونٹ میں تعینات تھا اور اس دوران اس نے خفیہ معلومات اپنے ایرانی ہینڈلر کو فراہم کیں، یوری اور اس کے ایرانی ہینڈلر  کے درمیان رابطہ ستمبر 2024 میں شروع ہوا۔
پولیس کی جانب سے مزید بتایا گیا کہ گرفتار اہلکاروں نے اپنی باقاعدہ اور ریزرو فوجی سروس کے دوران،  ایک ایرانی آپریٹر کے لیے مشن انجام دیا، جس میں فضائی دفاعی نظام کی ویڈیو بنانا، تل ابیب اور شمالی اسرائیل میں گرافٹی کا چھڑکاؤ، اور پوسٹر لٹکانا شامل ہیں۔
 پولیس کا کہنا ہے کہ دونوں نے اپنی حرکتوں کا اعتراف کیا ہے اور ان پر جنگ میں دشمن کی مدد کرنے کا الزام عائد کیا جائے گا، جس کی سزا عمر قید یا موت، غیر ملکی ایجنٹ سے رابطہ کرنے اور غیر ملکی ایجنٹ کو خفیہ معلومات فراہم کرنے کا ہے۔