مراکش کشتی حادثہ:  زندہ بچنے والےمزید 7 پاکستانی گھروں کو پہنچ گئے

اسلام آباد:مراکش کشتی حادثے میں زندہ بچ جانے والے مزید 7 افراد پاکستان پہنچ گئے۔
وفاقی تحقیقاتی ادارے (ایف آئی اے) کے مطابق پاکستانیوں کو مراکش بھجوانے والے انسانی اسمگلرز کی بھی شناخت ہوگئی ہے جن کی گرفتاری کیلئے چھاپے مارے جارہے ہیں۔
ایف آئی اے حکام کے مطابق وطن واپس آنے والوں میں 3 افراد گجرات اور ایک منڈی بہاءالدین کا رہائشی ہے اس کے علاوہ واپس پہنچنے والوں میں حافظ آباد، گوجرانوالہ اورسیالکوٹ کا بھی ایک ایک نوجوان شامل ہے۔
ایف آئی اے حکام نے مزید بتایاکہ منڈی بہاءالدین کے شعیب ظفر کو عثمان نامی ایجنٹ نے مراکش بھجوایا تھا اورگجرات کے مدثر حسین کو بھجوانے میں انسانی اسمگلر علی رضا ملوث ہے جب کہ گجرات کے عزیر اور عمران اقبال کو بھجوانے میں انسانی اسمگلر فادی گجر، حافظ آباد کے آصف کو بھجوانے میں لاہور کا رہائشی انسانی اسمگلر عثمان ملوث ہے۔

تمام متاثرین کو پاکستانی حکام کی نگرانی میں مراکش سے اسلام آباد لایا گیا، اور ان کی وطن واپسی کا عمل مکمل ہو چکا ہے۔