ارجن کپور اور راکول پریت سنگھ کی نئی فلم ’میرے ہسبینڈ کی بیوی‘ کا پوسٹر جاری

ممبئی:بالی وڈ اداکار ارجن کپوراور راکول پریت سنگھ کی نئی فلم ’میرے ہسبینڈ کی بیوی‘ کا پوسٹر جاری کر دیا گیا۔
فلم کے دلچسپ پوسٹر نے شائقین میں بے حد تجسس پیدا کر دیا ہے کیونکہ پوسٹر میں ارجن کپور کو درمیان میں دکھایا گیا ہے جبکہ بھومی پیڈنیکر اور راکول پریت گھوڑے پر بیٹھی ہوئی ہیں اور ارجن کو اپنی جانب کھینچ رہی ہیں۔
بالی وڈ اداکارارجن کپور نے انسٹاگرام پر فلم کا پوسٹر شیئر کرتے ہوئے مزاحیہ کیپشن بھی لکھا، ’’کھینچو، اور کھینچو، شرافت کی یہی سزا تو ہوتی ہے، کلیش ہو یا تصادم، پستا تو مجھ جیسا عام آدمی ہے۔‘‘
اداکار نےبتایا کہ فلم 21 فروری کو سینما گھروں کی زینت بنے گی۔
فلم کا پوسٹر ریلیز ہوتے ہی مداحوں کی جانب سے تبصروں کا تانتا بندھ گیا، ایک صارف نے لکھا کہ ’ہٹ ہے بھائی۔‘ دوسرے صارف نے کہا کہ ’بہت اچھا۔‘
خیال رہے کہ بالی وڈ اداکار ارجن کپور کو آخری بار فلم ’سنگھم اگین‘ میں دیکھا گیا تھا جس میں انہوں نے ایک منفی کردار نبھایا تھا،جبکہ راکول پریت سنگھ اپنی 2019 کی ہٹ فلم کے سیکوئل ’دے دے پیار دے 2‘ کی ریلیز کی منتظر ہیں جس کی ہدایت کاری انشول شرما نے کی ہے۔
دوسری جانب بھومی پیڈنیکر اپنی ویب سیریز کے آغاز کی تیاری میں مصروف ہیں جہاں وہ ایک پولیس اہلکار کے کردار میں نظر آئیں گی، فلم ’میرے ہسبینڈ کی بیوی‘ کی ریلیز کا انتظار اب شائقین بے صبری سے کر رہے ہیں۔