انسانی اسمگلرز کے خلاف سخت کریک ڈاؤن کریں گے ، وزیر داخلہ

وفاقی وزیر داخلہ محسن نقوی کا کہنا ہےکہ شہریوں کو غیرقانونی طور پر بیرون ملک بھیجنے والے ایجنٹ مافیا کے خلاف حکمت عملی تیار کرلی گئی ہے اور بہت جلد ان کے خلاف سخت کریک ڈاؤن ہونے والا ہے۔

محسن نقوی نے جائز طریقے سے دوسرے ممالک کا سفر کرنےوالوں کی پریشانیوں کا ذکر کرتے ہوئے کہاکہ مجھے لوگوں کے مسائل کا احساس ہے اور ہم نہیں چاہتےکہ جائز طریقے سے جانے والوں کو کسی قسم کی مشکلات کا سامنا کرنا پڑے۔

وفاقی وزیر داخلہ سینیٹر محسن نقوی نے کشتی حادثات کا حوالہ دیتےہوئے کہا کہ  امیگریشن کاؤنٹرز پر ہمیں سختی کرنی پڑرہی ہے، کیوں کہ کچھ لوگ غیرقانونی طریقوں سے کشتیوں کے ذریعے یورپ اور دیگر براعظموں میں جانےکی کوشش کرتے ہیں۔ 

ان کاکہنا تھاکہ گجرات اور فیصل آباد ڈویژن سے سب سے زیادہ لوگ غیرقانونی طور پر سفر کی کوشش کررہے ہیں،اسی ضمن میں ایف آئی اے میں بھی نمایاں تبدیلیاں ہونےوالی ہیں۔

وفاقی وزیر داخلہ کاکہنا تھاکہ جب پاکستانی قانونی طور پر بیرون ملک جاتےہیں تو ہمیں خوشی ہوتی ہے،لیکن غیرقانونی طور پر جانے والوں اور ملک کی بدنامی کا سبب بننےوالوں کے خلاف سخت کارروائی کی جائےگی۔