شہباز شریف معیشت کو ڈیفالٹ کے دہانے سے واپس لے کر آئےہیں، پاکستان دنیا کی بہترین معیشت بنے گا،عطا تارڑ

لاہور:وفاقی وزیر اطلاعات ونشریات عطا اللہ تارڑ نے کہا ہے کہ وزیر اعظم شہباز شریف ملکی معیشت کو ڈیفالٹ کے دہانے سے واپس لے کر آئے ہیں،انہوں نے کہا کہ وزیر اعظم کی قیادت میں پاکستان دنیا کی بہترین معاشی قوت بنے گا۔
وفاقی وزیر اطلاعات عطا اللہ تارڑ نےلاہور میں اپنےحلقے کے کارکنوں سے خطاب کرتے ہوئے کہا کہ ہم انتخابی مہم کے دوران کیے گئے وعدے پورے کر رہے ہیں،ہم نے وعدہ کیا تھا اس حلقے کو مثالی بنائے گے، ہم بین القوامی سطح پر بھی پاکستان کا مقدمہ لڑتے ہیں، ٹاؤن شپ کا علاقہ ایک مثالی علاقہ بنے گا۔
اپنے تقریر میںعطا تارڑکا کہنا تھا کہ ملک میں مہنگائی کی شرح میں کمی واقع ہوئی ہے۔انہوںنے کہا کہ ملکی برآمدات میں مسلسل اضافہ ہو رہا ہے۔ اور معیشت کی بہتری پر تمام ممالک پاکستان کی تعریف کر رہے ہیں،ان کا کہنا تھا کہ اب ملکی معیشت بہتری کی جانب گامزن ہے، سال  2025 ملکی ترقی کا سال ہو گا اور مہنگائی مزید کم ہو گی۔
پی ٹی آئی دور حکومت اور بانی پر تنقید کرتے ہوئے وفاقی وزیر اطلاعات عطا اللہ تارڑ کا کہنا تھا کہ ہم کہتے تھے یہ کرپشن زدہ ہیں اور ہماری بات درست ثابت ہوئی۔ آج یہ اپنے کیے ہوئے کاموں کی سزا بھگت رہے ہیں۔
 بانی پی ٹی پر تنقید کرتے ہوئے انہوں نے کہا کہ دنیا دیکھ رہی ہے کہ ایک وزیر اعظم تھا جو توشہ خانہ کی چیزیں بیچتا تھا، انہوں نے عوامی پیسے کو ذاتی مقاصد کے لیے استعمال کیا گیا جس کی مثال نہیں ملتی، 190 ملین پاؤنڈ کیس ملکی تاریخ کا سب سے بڑا ڈاکہ ہے۔ اور یہ 190 ملین پاؤنڈ کیس میں مذہب کے پیچھے چھپنے کی کوشش کر رہے ہیں۔ اس کیس میں یہ رنگے ہاتھوں پکڑے گئے ہیں۔
عطا تارڑ نے کہا کہ یہ اپنے دور میں صرف پیسے بنانے میں لگے رہے۔ اور ہم کہتے تھے یہ کرپشن زدہ ہیں، ہماری بات درست ثابت ہوئی۔ آج یہ اپنے کیے ہوئے کاموں کی سزائیں بھگت رہے ہیں۔