پاکستان اور ملائیشیا کے مابین قیدیوں کے تبادلےکا معاہدہ حتمی مراحل میں داخل

اسلام آباد: پاکستان اور ملائیشیا کے مابین قیدیوں کے تبادلے کا معاہدہ حتمی مراحل میں داخل ہوگیا۔
سفارتی ذرائع کے مطابق ملائیشیا نے قیدیوں کے تبادلے کے معاہدے کا مجوزہ ڈرافٹ پاکستان کے حوالے کر دیا ہے، جس میں پاکستانی مجوزہ ترامیم کو حتمی شکل دی جا رہی ہے، چند ہفتوں میں معاہدے پر دونوں ممالک کی جانب سے دستخط کرنے کا امکان ہے۔
سفارتی ذرائع کے مطابق معاہدے پر دستخط اسحاق ڈار کے دورہ ملائیشیا کے دوران متوقع ہیں، معاہدے کے بعد پاکستانی قیدی اپنی سزائیں پاکستان میں کاٹ سکیں گے۔
واضح رہے کہ ملائیشیا میں اس وقت 384 پاکستانی قیدی مختلف جرائم میں ملوث ہونے کے الزام میں قید ہیں۔
پاکستان اور ملائیشیا کے درمیان قیدیوں کے تبادلے کے اس معاہدے سے پاکستانی قیدیوں کی باقی ماندہ سزائیں پاکستان میں کاٹنے کی راہ ہموار ہوگی۔
دوسری جانب ملائیشیا میںقید پاکستانی کو جیل میں شناختی کارڈ اورپاسپورٹ کی تجدید کی سہولیات حاصل نہیں۔ دستاویزات نہ ہونے کے باعث اکثر پاکستانی قیدی اپنی سزاؤں کے خلاف اپیل کرنےکا حق استعمال نہیں کرپاتے۔