پی ڈی ایم کا غیر فطری اتحاد منطقی انجام کو پہنچ چکا ہے:عثمان بزدار

تفصیلات کے مطابق وزیراعلیٰ پنجاب سردار عثمان بزدارسے خواتین اراکین اسمبلی  نے ملاقات کی ۔وزیراعلیٰ عثمان بزدار سے صوبائی وزیر ویمن ڈویلپمنٹ آشفہ ریاض، طلعت فاطمہ نقوی اور زینب عمیرنے ملاقات کی۔اس موقع پر خواتین اراکین اسمبلی نے کہا کہ وزیراعلیٰ عثمان بزدار نے عوامی خدمت کی نئی مثال قائم کی ہے،پنجاب کی تاریخ میں پہلی بار نظر انداز علاقوں پر توجہ دی جا رہی ہے،آپ کی خواتین اراکین اسمبلی کے ساتھ مشاورت خوش آئند ہے۔

ملاقات میں وزیراعلیٰ پنجاب سردار عثمان بزدار کا کہنا تھا کہ پاکستان کی نصف سے زائد آبادی خواتین پر مشتمل ہے،پاکستانی خواتین با صلاحیت ہیں،ترقیاتی منصوبوں میں خواتین اراکین اسمبلی کے مشوروں کو اہمیت د ے رہے ہیں،خواتین اراکین اسمبلی کے علاقوں میں بھی ترجیحی بنیادوں پر ترقیاتی کام ہوں گے،عوامی خدمت کے سامنے شر پھیلانے والی سیاست اپنی موت آپ مر چکی ہے،پی ڈی ایم کا غیر فطری اتحاد منطقی انجام کو پہنچ چکا ہے،عوام کو دھوکہ دینا اپوزیشن کا وطیرہ ہے،عوام کو یہ ٹولہ گمراہ نہیں کرسکتا۔