گورنر خیبر پختونخوا نے صوبائی حکومت کاملازمین کی برطرفی کابل مسترد کر دیا

پشاور: گورنر خیبر پختونخوا فیصل کریم کنڈی نے صوبائی حکومت کی جانب سےپاس ہونے والا ملازمین کی برطرفی کا بل مستر دکر دیا۔
 گورنر خیبرپختونخوا فیصل کریم کنڈی نے صوبائی حکومت کی جانب سے ارسال کیا گیا بل واپس بجھواتے ہوئے اس میں مزید ترامیم کی ایڈوائس دے دی، بل واپس بھیجتے ہوئے انہوں نےکہا کہ صوبائی حکومت کا بل بنیادی حقوق کی خلاف ورزی ہے۔
گورنرنے غیر قانونی بھرتیوں کے ذمہ دار افسران کے خلاف کارروائی کی بھی سفارش کرتے ہوئے کہا کہ الیکشن کمیشن کی اجازت سے بھرتی ملازمین کو بل سے نکالا جائے۔
فیصل کریم کنڈی کا کہناتھا کہ ملازمین کو اپیل کے حق سے محروم کرنا آئین کے آرٹیکل اے 10 کی خلاف ورزی ہے۔ اور ماضی میں کی گئی قانونی بھرتیوں کو کالعدم قرار دینا غیر آئینی ہے۔
گورنر خیبر پختونخوا نے کہا کہ صوبائی حکومت بل پر نظرثانی کرے ورنہ عدالتی چیلنجز کا سامنا کرنا پڑ سکتا ہے۔ صرف ملازمین نہیں بلکہ بھرتی کرنے والے افسران بھی جوابدہ ہوں گے۔
واضح رہے کہ کچھ روز قبل صوبائی اسمبلی نے نگران دور میں بھرتی ہونے والے سرکاری ملازمین کو برخاست کرنے کے لیے بل پاس کیا تھا جس کی منظوری کے لیے گورنر کے پاس بھیجا گیاتاہم گورنر کی جانب سے اس بل کو مستر دکر دیا گیا ہے، خیال رہے کہ اس سےقبل بھی گورنر فیصل کریم کنڈی نے صوبائی اسمبلی سیکرٹریٹ کی جانب سے بھیجے گئے یونیورسٹیز ترمیمی ایکٹ کو بھی مستر د کر دیا تھا۔