معروف اداکار قاضی واجد کو مداحوں سے بچھڑے 7 برس بیت گئے

لاہور: پاکستان ریڈیو اور ٹیلی ویژن کے معروف اداکار قاضی واجد کو مداحوں سے بچھڑے 7برس بیت گئے، ان کے مداح آج ان کی ساتویں برسی منا رہے ہیں۔
اداکار قاضی واجد 1930 میں لاہور میں پیدا ہوئے، انہوں نےاپنے فنی کیرئیر کا آغاز  10 برس کی عمر میں کیا اور ریڈیو پاکستان پر بچوں کے پروگرام نونہال میں صدا کاری کے جوہر دکھائے، وہ 25 برس تک ریڈیو سے منسلک رہے اور اپنی صدا کاری کے سحر میں سب کو جکڑے رکھا۔
قاضی واجد نے پاکستان ٹیلی ویژن کیلئے1967ء میں پہلا ڈرامہ ’’ایک ہی راستہ‘‘ کیا، ڈرامہ ’’خدا کی بستی‘‘ سے ملک گیر شہرت حاصل ہوئی اور پھر کامیابی کا سفرجاری رہا۔
ان کے یادگار ڈراموں میں ’’دھوپ کنارے‘‘، ’’ان کہی‘‘، ’’تنہائیاں‘‘، ’’حوا کی بیٹی‘‘، ’’چاند گرہن‘‘، ’’پل دو پل‘‘ اور ’’انارکلی‘‘ شامل ہیں، قاضی واجد کو 14 اگست 1988 کو صدارتی تمغہ برائے حسن کارکردگی سے بھی نوازا گیا۔
 ان کی منفرد اداکاری کے سبب ان کا شمار پاکستانی ٹیلی ویژن کے عظیم اداکاروں میں کیا جاتا ہے۔ 
قاضی واجد 11 فروری 2018 کو دل کا دورہ پڑنے کے سبب کراچی میں انتقال کر گئے۔ ان کے ادا کردہ کردار اور ان کا فن ہمیشہ ناظرین کے دلوں میں زندہ رہے گا۔