لاہور : پولیس اہلکار پر تشدد کرنے والے ملزمان اسلام آباد سےگرفتار

لاہور:  پولیس نے ایف آئی اے کورٹ کے باہراسسٹنٹ سب انسپکٹر(اے ایس آئی) محمد شاہد پر تشدد کرنے والے ملزمان کو اسلام آباد سے گرفتار کر لیا گیا۔
لاہور پولیس کے مطابق گزشتہ روز انوسٹی گیشن ونگ کی ٹیم مزنگ میں ایک اشتہاری ملزم کی گرفتاری کے لیے گئی تھی، جہاں ملزم نے ساتھیوں کے ہمراہ پولیس ٹیم پر حملہ کر دیا اور اے ایس آئی شاہد پر شدید تشدد کیا، جس کے نتیجے میں وہ جان کی بازی ہار گیا، جبکہ ایک کانسٹیبل اہلکار شدید زخمی ہو گیا جس کو تشویشناک حالت میں اسپتال منتقل کیا گیا تھا۔
اہلکاروں پر تشدد کے بعد ملزمان موقع سے فرار ہو گئے اور روپوش ہو گئے تھے،جن کی گرفتاری کے لیے خصوصی ٹیم تشکیل دی گئی، جس کی نگرانی ڈی آئی جی آپریشنز نے خود کی۔
 ڈی آئی جی آپریشنزفیصل کامران کے مطابق پولیس نےانٹیلیجنس اور جدید ٹیکنالوجی کی مدد سے چوبیس گھنٹوں کے اندر ملزمان عدیل جاوید اور عمیر جاوید کو بنی گالہ اسلام آباد سے گرفتار کر لیا،گرفتار ملزمان کو مزید کارروائی کے لیے انویسٹیگیشن ونگ کے حوالے کر دیا گیا ہے۔
پولیس حکام کا کہنا ہے کہ محکمہ پولیس کے جوان اپنی جان ہتھیلی پر رکھ کر قوم کی خدمت کرتے ہیں اور فرض کی راہ میں جان دینے والے افسران اور اہلکار ہمارا قیمتی اثاثہ ہیں۔