نئی دہلی ریلوے اسٹیشن پر بھگدڑ مچنے سے خواتین اور بچوں سمیت 18 افراد ہلاک

بھارتی دارالحکومت نئی دہلی کےریلوے اسٹیشن پر بھگدڑ مچنے سے 18 افراد ہلاک ہوگئے۔ 

بھارت کے شہر نئی دہلی کے ریلوے اسٹیشن پر ہندوؤں کے مذہبی تہوار مہا کمبھ کے میلے میں جانے والے مسافروں میں بھگدڑ مچ گئی جس کی وجہ سے خواتین سمیت 18 افراد ہلاک جبکہ 10 زخمی ہو گئے۔

بھارتی میڈیا کے مطابق ہلاک ہونے والوں میں 10 خواتین اور 4 بچے بھی شامل ہیں جبکہ متعدد افراد زخمی بھی ہوئے ہیں۔ 

نئی دہلی کے لوک نائک اسپتال کی ڈپٹی میڈیکل سپرنٹنڈنٹ ڈاکٹر ریتو سکسینہ نے برطانوی خبر رساں ادارے کو ہلاک شدگان کی تعداد کی تصدیق کرتے ہوئے کہا کہ بعض زخمیوں کی حالت تشویشناک ہے اور خدشہ ہے کہ ہلاکتوں کی تعداد میں اضافہ ہو سکتا ہے۔

ریلوے اسٹیشن حکام کے مطابق اسٹیشن کے اندر دو ٹرینیں تاخیر کا شکار ہوئیں جبکہ تیسری ٹرین پریاگ راج جانے والی تھی جس کی وجہ سے اسٹیشن پر کافی ہجوم اکٹھا ہو گیا۔

واضح رہے کہ چند ہفتے قبل شمالی بھارت میں کمبھ میلے کے تہوار کے موقع پر صبح سویرے ہجوم میں بھگدڑ مچنے سے درجنوں افراد ہلاک ہو گئے تھے۔

لاکھوں ہندو چھ ہفتوں تک جاری رہنے والے تہوار کے مقدس دنوں میں سے ایک پر مقدس ندی کے پانی میں غوطہ لگانے کے لیے جمع ہوئے تھے۔