مصطفی قتل کیس میں نئی پیش رفت ، والد کی پریس کانفرنس

مصطفی قتل کیس کے مرکزی ملزم ارمغان کے والد، محمد کامران اصغر قریشی نے کراچی پریس کلب کے باہر میڈیا سے گفتگو کرتے ہوئے اپنے بیٹے کی بے گناہی پر زور دیا اور اپنے تحفظات کا اظہار کیا۔
انہوں نے کہا کہ انہیں اپنی جان کا خطرہ ہے اور وہ مرتضی بھٹو نہیں ہیں۔

کامران قریشی نے کہا کہ ان کے بھائی اے وی ایل سی کے انچارج ہیں اور ان کے بیٹے نے اپنے بھائی کی وجہ سے سرینڈر کیا ہے ، انہوں نے مزید وضاحت دیتے ہوئے کہا کہ سارہ، جو ان کی سابقہ بیوی ہے، کے ہاتھ میں بیگ تھا جو چھین لیا گیا ، بیگ میں ایک لیپ ٹاپ تھا جس کا تعلق سافٹ ویئر ہاؤس سے تھا، اور اس وجہ سے اس کی سیکیورٹی رکھی گئی تھی۔

کامران قریشی نے کہا کہ ان کے بیٹے نے ون فائیو پر کال بھی کی تھی اور انہوں نے یہ بھی دعویٰ کیا کہ وہ پاکستان کے پہلے راک اسٹار تھے اور مین لیٹ شو نہیں کیا گیا تھا۔

کامران قریشی نے مختلف بیانات کا حوالہ دیتے ہوئے کہا کہ کبھی یہ کہا جاتا ہے کہ لاش ندی سے ملی، اور کبھی کہا جاتا ہے کہ شیروں کو کھلائی گئی تھی۔

انہوں نے مصطفی عامر کے ساتھ ہونے والی زیادتی پر افسوس کا اظہار کرتے ہوئے کہا کہ انہیں اس واقعے کا علم 8 تاریخ کو ہوا۔

کامران قریشی نے مزید کہا کہ انہیں سسٹم پر اعتماد نہیں ہے اور پولیس والے اب ججوں کے آرڈرز کو بھی نہیں مانتے ہیں، جس سے ان کی تشویش میں مزید اضافہ ہوا ہے۔

انہوں نے اس بات کو مسترد کیا کہ یہ واقعہ کال سینٹر سے جڑا تھا اور اسے سافٹ ویئر ہاؤس قرار دیا ، انہوں نے عدالت سے امید ظاہر کی کہ چھوٹی سی کرن باقی ہے اور کہا کہ اگر بلال ٹینشن کو ڈھونڈ لیا جائے تو کیس حل ہو سکتا ہے۔

انہوں نے اپنی بے گناہی کا دعویٰ کرتے ہوئے کہا کہ وہ قاتل کا نام نہیں بتائیں گے، تاہم ان کا ماننا ہے کہ ان کے بیٹے کا اس قتل میں کوئی کردار نہیں۔