عامر خان اور کرن راؤ کا شادی کے 15 سال بعد علیحدگی کا اعلان

بھارتی میڈیا رپورٹس کے مطابق  عامر خان اور کرن راؤ نے مشترکہ بیان میں اپنی طلاق کا اعلان کیا ہے ۔ انہوں نے کہا کہ وہ اپنے بیٹے آزاد راؤ خان کی پرورش مل کر کریں گے ، اس کے ساتھ ساتھ  وہ دونوں " پانی  فاؤنڈیشن اور دوسرے جاری منصوبوں پر اپنی شراکت داری جاری رکھیں  گے ۔ عامر خان اور کرن راؤ کی طرف سے جاری  بیان میں   کہا  گیا ہے کہ ان 15 خوبصورت سالوں میں ہم نے زندگی بھر کے تجربات ، خوشی اور قہقہوں کو شئیر کیا ہے ، ہمارا رشتہ صرف اعتماد ، احترام اور محبت میں  پروان چڑھا ہے ۔اب ہم اپنی زندگی  کا  ایک نیا باب شروع کرنا چاہیں گے  جو کہ  اب شوہر اور بیوی کی حیثیت سے نہیں بلکہ شریک والدین  کا رشتہ ہوگا ۔بیان میں مزید کہا گیا کہ عامر اور کرن ‘کچھ عرصہ قبل’ الگ ہوگئے تھے ۔

خیال رہے کہ عامر خان نے کرن راؤ سے  2005 میں شادی کی تھی اور دونوں کے ہاں 2011 میں  بیٹے آزاد کی پیدائش ہوئی تھی۔اس سے قبل  عامر خان نے کیریئر کے آغاز میں 1986 میں ہی اداکارہ رینا دتا سے شادی کی تھی مگر ان کی پہلی شادی بھی 16 سال بعد 2002 میں طلاق پر ختم ہوئی تھی۔ عامر خان کی  پہلی شادی سے دو بچے ہیں، جن میں بیٹی ارا خان اور بیٹا جنید خان ہے ۔