ملک میں بارش اور برفباری کا سلسلہ وقفے وقفے سے جاری، مختلف حادثات میں 8 افراد جاں بحق

ملک میں بارش اور برفباری کا سلسلہ وقفے وقفے سے جاری ہے، بارش کے باعث موسم خوشگوار اور سردی کی شدت میں اضافہ ہوگیا دوسری جانب ملک میں بارشوں کا دھواں دھاراسپیل کے دوران مختلف حادثات میں بہن بھائی سمیت 8 افراد جاں بحق ہوگئے۔

محکمہ موسمیات کے مطابق بارش کا سلسلہ آئندہ چند روز تک جاری رہے گا، خیبر پختونخوا میں آئندہ 24 گھنٹوں کے دوران مزید بارش اور پہاڑوں پر برف باری کا امکان ہے، گزشتہ روز سب سے زیادہ بارش کالام میں 22 ملی میٹر ریکارڈ کی گئی۔

24 گھنٹوں کے دوران پشاور، نوشہرہ ، مردان ، چارسدہ ، صوابی ،چترال ، دیر، سوات، شانگلہ، بونیر، مالاکنڈ ،ایبٹ اباد ، ہری پور، مانسہرہ ، بٹگرام ، کوہستان، تورغر،باجوڑ ۫، مہمند ، کوہاٹ ، ہنگو ، کرک ، لکی مروت، بنوں ، کرم، ڈی آئی خان ، ٹانک، شمالی و جنوبی وزیر ستان میں بارش اور بالائی اضلاع میں پہاڑوں پر برف باری کا امکان ہے۔

گزشتہ روز صوبے کے بیشتر اضلاع میں بارش اور مالم جبہ میں برف باری ہوئی، کالام میں 22 ، پارا چنار اور دیر میں 16 ملی میٹر بارش ہوئی، اس کے علاوہ مالم جبہ میں 12 اور پشاور میں 11 ملی میٹر بارش ریکارڈ کی گئی۔

پشاور کا کم سے کم درجہ حرارت 9 ڈگری سینٹی گریڈ ریکارڈ کیا گیا، شہر کا زیادہ سے زیادہ درجہ حرارت 19 ڈگری سینٹی گریڈ تک جانے کا امکان ہے جبکہ پارا چنار میں درجہ حرارت منفی 3 ،کالام میں منفی 1 ڈگری سینٹی گریڈ ریکارڈ ہوا۔

دوسری جانب بارش کے باعث مختلف حادثات میں 2 بچوں سمیت 8 افراد جاں بحق جبکہ خاتون اور متعدد زخمی ہوگئے۔ کرک میں مکان کی چھت گرنے سے دو کمسن بہن بھائی جاں بحق ہوئے جبکہ خاتون اور 2 بچے زخمی ہوگئے۔

دیربالا اور سوات میں بارش اوربرفباری سے سردی لوٹ آئی، مالم جبہ، کالام اور مہوڈنڈ میں برفباری سے ہرسو سفیدی چھاگئی۔ بلوچستان میں بھی خوب بارش برسی، چمن میں آندھی سےگھروں کی دیواریں اور بجلی کے ٹاورگرگئے۔

پنجاب کے شہروں شیخوپورہ، فاروق آباد، رینالہ خورد، کلورکوٹ، شرقپورشریف اوردیگرعلاقوں بارش سے جل تھل ایک ہوگیا۔