دنیا کے معمر ترین سابق ٹیسٹ کرکٹر 98 سال کی عمر میں انتقال کر گئے

کیپ ٹاؤن:دنیا کےمعمر ترین سابق ٹیسٹ کرکٹر رون ڈریپر 98 سال اور 63 دن کی عمر میں جنوبی افریقا میں انتقال کر گئے۔
غیر ملکی میڈیا کے مطابق رون ڈریپر کا انتقال منگل کے روز گیکیبرہا کے ایک ریٹائرمنٹ ہوم میں ہوا، جس کی تصدیق آج ان کے اہل خانہ کی جانب سے کی گئی۔
 رون ڈریپر ایک ٹاپ آرڈر بلے باز اور جز وقتی وکٹ کیپر تھے، انہوں نے 1950 میں آسٹریلیا کے خلاف جنوبی افریقا کی جانب سے 2 ٹیسٹ میچز کھیلے تھے۔
رون ڈریپر 24 دسمبر 1926 کو پیدا ہوئے اور انہوں نے اپنی فرسٹ کلاس کرکٹ میں ایسٹرن پروونس کی جانب سے اورنج فری اسٹیٹ کے خلاف اپنے 19ویں یوم پیدائش پر سنچری اسکور کی،انہوں نے 1949میں آسٹریلیا کے خلاف ایسٹرن پروونس کی نمائندگی کرتے ہوئے 86 رنز بنانے پر انہیں آسٹریلیا کے خلاف ٹیسٹ سیریز کے آخری دو ٹیسٹ میچوں کے لیے منتخب کیا گیا تاہم 3 اننگز میں وہ صرف 25 رنز ہی بنا سکے۔
ڈریپر نے 60-1959 تک فرسٹ کلاس کرکٹ جاری رکھی اور 41.64 کی اوسط کے ساتھ اپنا کریئر مکمل کیا۔
 53-1952 کے سیزن میں انہوں نے مسلسل 2 میچوں میں لنچ سے قبل سنچریاں اسکور کیں۔ 
دوسرے میچ میں انہوں نے دوسری اننگز میں بھی سنچری بنا کر جنوبی افریقہ کے طویل عرصے سے جاری کرکٹ مقابلے ’کری کپ‘ میں ایک ہی میچ میں 2 سنچریاں بنانے والے پہلے کھلاڑی کا اعزاز حاصل کیا۔
 رون ڈریپر انتقال کے بعد آسٹریلیا کے نیل ہاروی اب 96 سال کی عمر کے ساتھ سب سے معمر ٹیسٹ کرکٹر بن گئے ہیں جو بقید حیات ہیں۔