وزیراعظم نے رمضان پیکیج کا اعلان کردیا، 40 لاکھ خاندانوں کو 5 ہزار کی رقم ملے گی

اسلام آباد: وزیر اعظم شہباز شریف نے رمضان پیکج کا اعلان کر دیا جس کے تحت کے 40 لاکھ مستحق خاندانوں کو فی خاندان 5 ہزار روپے کی رقم ملے گی۔
وزیراعظم شہباز شریف نے ر مضان پیکیج کی افتتاحی تقریب سے خطاب کرتے ہوئے کہا ہے کہ ڈیجیٹل والٹ کے ذریعے رقم براہ راست مستحق افراد تک پہنچے گی،انہوں نے کہاکہ رمضان ریلیف پیکج سے 40 لاکھ خاندان مستفید ہوں گے۔
شہبازشریف نے کہا کہ ڈیجیٹل والٹ کے ذریعے 5ہزارروپے فی خاندان دیے جائیں گے،گزشتہ سال کے 7ارب روپے کے رمضان پیکج کے مقابلے میں اس بار3گنا بڑھادیا ہے،2کروڑافرادرمضان ریلیف پیکج سے مستفید ہو ں گے۔
انہوں نے مزید کہا کہ ہمیں سفید پوش لوگوں کی مدد کرنی ہے،رمضان ریلیف پیکج کے لیے 20 ارب روپے کی رقم مختص کی گئی ہے،وزیراعظم نے کہا ہے کہ رمضان پیکج پورے پاکستان کے لیے بلاتفریق متعارف کروایا گیا ہے۔
شہباز شریف کا کہنا تھا کہ کراچی سے گلگت تک تمام شہروں کے مستحق خاندانوں کو اس میں شامل کیا گیا ہے، اسے شفاف بنانے کے لیے اسٹیٹ بینک، نادرا، ٹیک اداروں کی کاوشیں لائق تحسین ہیں،  اس بار رمضان پیکج کو انتہائی آسان بنایا ہے، اب عوام کو لمبی قطاروں میں نہیں کھڑا ہونا پڑے گا۔
اکوڑہ خٹک حملے کی مذمت
وزیراعظم نے اکوڑہ خٹک میں خودکش دھماکے میں مولانا حامد الحق کی شہادت اور دیگر پاکستانیوں کی شہادت کی مذمت کرتے ہوئے سے ایک المناک واقعہ قرار دیا،ان کا مزید کہنا تھا کہ یہ قدیم جامعہ ہے، جہاں اسلامی و عصری تعلیم فراہم کی جاتی ہے، یہ سچے پاکستانی ہیں، اس واقعے پر قوم افسردہ ہے۔
شہباز شریف نے اس کی شدید الفاظ میں مذمت کرتے ہوئے کہا کہ امید ہے خیبرپختونخوا حکومت ان قاتلوں کو گرفتار کرکے قرار واقعی سزا دے گی۔
 رمضان پیکیج کی افتتاحی تقریب سے خطاب کرتے ہوئے وزیراعظم شہباز شریف نے کہا کہ دہشتگردی کا قلع قمع کیا جائے گا، اس ناسور کا خاتمہ کیا جائے گا، ایسی قبر کھو دیں گے دوبارہ اس ناسور کا نکلنا ممکن نہیں ہوگا، ہم اس وقت تک چین سے نہیں بیٹھیں گے، جب تک اس ناسور کو دفن نہیں کر دیتے۔
انہوں نے کہا کہ دہشت گردی کا خاتمہ 2018ء میں ہو چکا تھا، ملک میں قیام امن کے لیے 80 ہزار پاکستانیوں نے اپنی جانوں کا نذرانہ پیش کیا جائے، اسی طرح پاک فوج کے افسران، جوان، پولیس اور قانون نافذ کرنے والے دیگر اداروں کے اہل کاروں کی قربانیاں بھی وطن عزیز کو محفوظ بنانے کے لیے دی گئیں، مگر ایک بار پھر دہشت گردی کا ناسور سر اٹھا رہا ہے، اس کی وجوہات کا سب کو پتا ہے، فی الحال اس کی تفصیل میں جانا نہیں چاہتا۔