حکومت کا فرض ہے کہ غریب طبقے کی مدد کرے : وزیراعظم

 تفصیلات کے مطابق وزیر اعظم عمران خان نے احساس کفالت پروگرام کے دوسرے مرحلے کی تقریب سے خطاب کرتے ہوئے کہا کہ غریب اور نادار لوگوں کو صحت کارڈ فراہم کرنے کی سہولت دیں گے۔ احساس کفالت پروگرام کوئی احسان نہیں، حکومت کا فرض ہے، احساس کفالت پروگرام کے تحت مستحق افراد کو پیسے ملتے رہیں گے، تمام خاندانوں کو صحت کارڈ فراہم کیا جائے گا، اخوت کیساتھ مل کر کمزور طبقے کیلئے گھر بنانے میں مدد کریں گے۔

وزیراعظم کا کہنا تھا کہ مستحق افراد کو اپنے پاؤں پرکھڑا کرنے کیلئے چھوٹے کاروبار کیلئے سہولت فراہم کرینگے، نیا پاکستان ہاؤسنگ سکیم پر کام شروع ہوچکا ہے۔ نیا پاکستان ہاؤسنگ سکیم بھی مزدور طبقے کیلئے ہے، مستحقین کو سود کے بغیر قرض فراہم کریں گے، کوئی یہ نہیں کہہ سکتا کہ ہم نے احساس پروگرام میں پیسوں کی تقسیم سیاسی بنیادوں یا منصفانہ طریقے سے نہیں کی  ۔تمام  غیر مستحق 30 ہزار افراد کو سکیم سے نکالا جاچکا۔  یہ ثانیہ نشتر کی ٹیم کو کریڈٹ جاتا ہے کہ کہیں سے یہ آواز نہیں آئی کہ پیسے کی تقسیم غیرمنصفانہ تھی بلکہ کورونا کے دوران  سندھ کی آبادی کے حساب سے ہم نے زیادہ پیسہ سندھ میں دیا، حالانکہ ہماری وہاں حکومت نہیں تاہم ہم نے میرٹ کی بنیاد پر یہ کیا۔کورونا کے دوران لبنان کی حکومت نے سیاسی بنیادوں پر پیسے بانٹے تھے، لبنان میں پیسے کی منصفانہ تقسیم نہیں کی اس لیے لوگ وہاں مظاہرے کر رہے ہیں۔  

وزیراعظم  نے کہا کہ ہم آج سے اس کا دوسرا مرحلہ شروع کر رہے ہیں جس میں 70 لاکھ خاندانوں میں ہم آج سے پیسے بانٹنا شروع کر رہے ہیں ۔وزیراعظم نے یقین دلایا کہ ہماری ذمہ داری ہے کہ آپ کی مدد کی جائے اور ذمہ داری پوری کی جائے، یہ احساس پروگرام بڑھتا جائے گا اور ہم مزید چیزیں لائیں گے ۔