مہنگائی کے ستائے عوام پرایک بار پھر بجلی بم گرا دیا گیا

تفصیلات کے مطابق حکومت نے ایک بار پھر مہنگائی سے پریشان  عوام کو بجلی کا جھٹکا دے دیا ،  نیشنل الیکٹرک پاور ریگولیٹری اتھارٹی (نیپرا) نے  ماہانہ فیول چارجز ایڈجسٹمنٹ  برائے دسمبر  2020 کی  مد میں ایک روپے 53 پیسے فی یونٹ اضافے کی منظوری دے دی۔

نیپرا کی جانب سے  جاری  نوٹیفیکیشن کے مطابق  سی پی پی اے جی نے ایک روپے 80 پیسے فی یونٹ اضافے کی درخواست کی تھی تاہم ایک روپے 53 پیسے کا اضافہ کیا گیا۔ اتھارٹی نے 27 جنوری 2021 کو   ایف سی اے پر عوامی سماعت کی تھی، اس کا اطلاق صرف فروری  کے مہینے کے بلوں پر ہوگا۔اس کا اطلاق ڈسکوز کے تمام صارفین ماسوائے لائف لائن صارفین پر ہوگا۔نوٹیفیکیشن میں کہا گیا ہے کہ  فیول پرائس ایڈجسٹمنٹ کا اطلاق کے الیکٹرک صارفین پر نہیں ہوگا۔

خیال رہے کہ   28جنوری کو  نیشنل پاور ریگولیٹری اتھارٹی (نیپرا) نے بجلی کی قیمت میں فی یونٹ 3.5 روپے اضافے کا  عندیہ دیا تھا   ۔ اس سے قبل 11 جنوری کو نیپرا نے صارفین سے 8.40 ارب  روپے اضافی بوجھ ڈالتے ہوئے  بجلی کے نرخوں میں فی یونٹ 1۔6 روپے اضافے کی اطلاع دی تھی۔