بنگلادیش کرکٹ ٹیم کے سینئر بیٹر مشفیق الرحیم کا ون ڈے کرکٹ سے ریٹائرمنٹ کا اعلان

بنگلادیش کرکٹ ٹیم کے سینئر بیٹر مشفیق الرحیم نے ون ڈے کرکٹ سے ریٹائرمنٹ کا اعلان کردیا۔

 بنگلہ دیش کی جانب سے سب سے زیادہ 274 ون ڈے میچز کھیلنے والے سینئر بلے باز مشفیق الرحیم نے سوشل میڈیا پر اپنی ریٹائرمنٹ کا اعلان کیا۔ مشفیق الرحیم کا کہنا تھا کہ میں اپنے خاندان، دوستوں اور مداحوں کا دل سے شکریہ ادا کرتا ہوں جن کے لیے میں گزشتہ 19 سال سے کرکٹ کھیل رہا ہوں۔

 واضح رہےکہ وکٹ کیپر بیٹر مشفیق الرحیم بنگلہ دیشی ٹیم کی قیادت بھی کرچکے ہیں۔

 مشفیق الرحیم نے 274 ون ڈے میچز میں 9 سنچریوں اور 49 نصف سنچریوں کی مدد سے 7 ہزار 795 رنز بنائے۔ ان سے پہلے ون ڈے کرکٹ میں بنگلہ دیش کی جانب سے سب سے زیادہ رنز بنانے والے بیٹر تمیم اقبال ہیں جنہوں نے 8 ہزار 357 رنز بنائے ہیں۔

 وکٹوں کے پیچھے مشفیق الرحیم نے بنگلہ دیش کی جانب سے سب سے زیادہ 299 شکار کیے جن میں 243 کیچ اور 56 اسٹمپ شامل ہیں۔ مشفیق الرحیم ٹی ٹونٹی کرکٹ سے 2 سال قبل ہی ریٹائر ہوچکے ہیں جبکہ وہ ٹیسٹ کرکٹ کھیلتے رہیں گے۔

انہیں 100 ٹیسٹ کھیلنے والا پہلا بنگلہ دیشی کرکٹر بننے کے لیے مزید 6 ٹیسٹ کھیلنا ہیں۔