آئی سی سی چیمپئنز ٹرافی میں ہونے والی بدانتظامیوں پر پی سی بی کا احتجاج ریکارڈ کرانے کا فیصلہ

لاہور: پاکستان کرکٹ بورڈ (پی سی بی) نے آئی سی سی چیمپئنز ٹرافی کے دوران ہونے والی بدانتظامیوں پر پر انٹرنیشنل کرکٹ کونسل سے احتجاج ریکارڈ کرانے کا فیصلہ کر لیا۔
ذرائع کے مطابق چیمپئنز ٹرافی کی اختتامی تقریب میں ٹورنامنٹ ڈائریکٹر اور پی سی بی کے سی او او کو نظر انداز کیا گیا۔ جبکہ آئی سی سی نے چیمپئنز ٹرافی کے دوران متعدد غلطیاں کیں۔
بھارت بنگلہ دیش میچ کے دوران ٹورنامنٹ کا غلط لوگو نشر کیا گیا، اور آسٹریلیا انگلینڈ میچ کے آغاز سے قبل بھارت کا ترانہ چلایا گیا۔
ذرائع کا مزید کہنا ہے کہ پی سی بی اختتامی تقریب میں نمائندگی نہ دینے کے معاملے کوبھی آئی سی سی میں اٹھائے گا، پی سی بی آئی سی سی سے پوچھے گا کہ اختتامی تقریب میں سی ای او سمیر احمد سید کو کیوں نہیں بلایا گیا۔
خیال رہے کہ چیمپئنز ٹرافی کے ٹورنامنٹ ڈائریکٹر سمیر احمد سید دبئی میں موجود تھے لیکن دبئی میں موجودگی کے باوجود چیمپئنز ٹرافی کی اختتامی تقریب میں پاکستان کو نمائندگی نہیں دی گئی۔
دوسری جانب چیئرمین محسن نقوی کو فائنل کی پریزینٹیشن میں جانا تھا تاہم محسن نقوی طبیعت ٹھیک نہ ہونے کی وجہ سے فائنل میں شریک نہ ہو سکے تھے۔
واضح رہے کہ چیمپئنز ٹرافی 2025 گزشتہ روز اپنے اختتام کو پہنچا اور بھارت چیمپئنز ٹرافی کی فاتح ٹھری۔ بھارت نے نیوزی لینڈ کو 4 وکٹوں سے شکست دی۔