وزیر اعلی پنجاب نے بس سروس کے کرایوں میں اضافے کو مسترد کر دیا

وزیراعلیٰ پنجاب مریم نوازشریف نے ٹی ڈی سی پی کی ڈبل ڈیکر بس سروس کے کرایوں میں اضافے کو مسترد کرتے ہوئے متعلقہ حکام کو کرایوں میں اضافے کا نوٹیفکیشن واپس لینے کی ہدایت کی۔

مریم نوازشریف کی ہدایت پر کرایوں میں اضافہ واپس لے لیا گیا اور بس سروس کے پرانے کرائے بحال کر دیے گئے ہیں۔

وزیراعلیٰ مریم نوازشریف نے لاہور کی سیاحت کے لیے چلنے والی تین روٹ کی ڈبل ڈیکر بس سروس کے کرائے میں اضافے پر ناپسندیدگی کا اظہار کیا اور کہا کہ اس اضافے سے عوام پر بوجھ پڑے گا۔

تفصیلات کے مطابق، ٹورازم ڈویلپمنٹ کارپوریشن پنجاب (ٹی ڈی سی پی) نے اپنی سائٹ سی لاہور بس سروس کے کرایوں میں 200 سے 500 روپے تک اضافہ کیا تھا، جب کہ کارپوریٹ سیکٹر، تعلیمی اداروں اور کمرشل سرگرمیوں کے لیے کرایوں میں 5,000 سے 20,000 روپے تک اضافہ تجویز کیا گیا تھا۔

انہوں نے مزید کہا کہ عوام کو سیر و سیاحت کی بہترین سہولتیں کم از کم چارجز پر فراہم کی جائیں گی اور یہ سلسلہ جاری رکھا جائے گا۔