ایلون مسک کا آئندہ سال مریخ پر اسٹار شپ مشن بھیجنے کا اعلان

واشنگٹن:دنیا کے امیر ترین انسان اور اسٹارلنک کے بانی ایلون مسک نے آئندہ سال مریخ سیارے پر اسٹارشپ مشن بھیجنے کا اعلان کر دیا ہے،
خیال رہے کہ اب تک کوئی انسان زمین سے باہر کسی اور سیارے پر قدم نہیں رکھا سکا مگر آئندہ چند سال میں نئی تاریخ رقم ہونے والی ہے۔
کم از کم اسپیس ایکس کے مالک ایلون مسک کے دعوؤں کو دیکھا جائے تو 2029 سے 2031 کے دوران انسان مریخ پر قدم رکھ دیں گے۔
ایلون مسک نے ایکس (ٹوئٹر) پر پوسٹس کرتے ہوئےکہا کہ 2026 کے آخر میں اسپیس ایکس کی جانب سے اسٹار شپ کو ایک روبوٹ کے ساتھ مریخ کی جانب روانہ کیا جائے گا۔
ایلون مسک کی جانب سے یہ اعلان اس وقت کیا گیا جب اسٹار شپ کی 8 آزمائشی پرواز گزشتہ دنوں ناکام ہوگئی تھی۔
خیال رہے کہ یہ پہلا موقع نہیں جب ایلون مسک کی جانب سے مریخ پر مشن بھیجنے کی بات کی گئی ہے۔
وہ عرصے سے مریخ پر انسانی بستیوں کو بسانے کی بات کر رہے ہیں اور 2016 میں انہوں نے کہا تھا کہ توقع ہے کہ ریڈ ڈراگون اسپیس کرافٹ 2018 میں مریخ پر پہنچ جائے گا۔