سرگودھا: منشیات فروشوں کی فائرنگ سے2 پولیس اہلکارشہید، 2زخمی

پنجاب کے ضلع سرگودھا میں منشیات فروشوں کی فائرنگ سے2 پولیس اہلکارشہید،جبکہ2 شدید زخمی ہو گئے۔
ترجمان سرگودھا پولیس کے مطابق پولیس نے منشیات فروش ملزمان کی گرفتاری کیلئے چھاپہ مارا تو ملزمان نے فائرنگ کردی۔
ترجمان پولیس کا کہنا تھا کہ زخمی اہلکاروں میں سب انسپکٹراورایلیٹ کانسٹیبل شامل ہیں، جن کو طبی امداد کے لیے مقامی اسپتال منتقل کردیا گیا۔
ترجمان کی جانب سے مزید بتایا گیا کہ منشیات فروش ملزمان اندھیرے کا فائدہ اٹھاتے ہوئے فرارہونے میں کامیاب ہوگئے، جن کی گرفتاری کے لیے چھاپے مارے جا رہے ہیں۔
ریجنل پولیس آفیسر(آر پی او) سرگودھا محمد شہزاد آصف خان اور ڈی پی او محمد صہیب اشرف پولیس کی بھاری نفری کے ہمراہ موقع پر پہنچ گئے اور معاملے کی نگرانی کی۔ شہداء کے جسد خاکی اور زخمی پولیس اہلکاروں کو ڈسٹرکٹ ہیڈ کوارٹر اسپتال منتقل کر دیا گیا۔
پنجاب پولیس نے عزم کا اظہار کیا ہے کہ شہداء کی قربانی رائیگاں نہیں جائے گی اور ملزمان کو جلد گرفتار کر کے قانون کے کٹہرے میں لایا جائے گا۔
دوسری جانب اس افسوسناک واقعے پر آئی جی پنجاب ڈاکٹرعثمان انور نے نوٹس لیتے ہوئے آر پی او سرگودھا  سے رپورٹ طلب کرلی اور کہا کہ جلد از جلد ملزمان کو گرفتارکے قانون کے کہٹرے میں لایا جائے۔