چیک باؤنس کا مقدمہ،بنگلہ دیشی کرکٹر شکیب الحسن کے اثاثے ضبط کرنے کا حکم

ڈھاکہ :چیک باؤنس کے مقدمے میں بنگلہ دیشی عدالت نے کرکٹر اور عوامی لیگ کے سابق رکن اسمبلی شکیب الحسن کے اثاثے ضبط کرنے کا حکم دے دیا۔
 غیر ملکی میڈیا رپورٹس کے مطابق ڈھاکہ کے ایڈیشنل چیف میٹروپولیٹن مجسٹریٹ ضیاء الدین رحمان نے پیر کو چیک باؤنس کیس میں شکیب الحسن کی جائیدا ضبط کرنے کا حکم دیا۔
 شکیب نے 2016 میں بنگلہ دیش میں ستکھیرا میں ایک کیکڑے کا فارم بنایا تھاجو 2021 سے غیر فعال ہے۔ مذکورہ چیکس بینک سے لیے گئے قرض کی ادائیگی کے لیے تھے جو شکیب کی اس کمپنی نے بینک سے لیا تھا لیکن چیکس ناکافی فنڈز کی وجہ سے باؤنس ہو گئے تھے۔
میڈیا کے مطابق اکتوبر 2024 میں بنگلہ دیشی بینک نے باؤنس ہونے والے چیکس کے معاملے پر قانونی نوٹس جاری کیا تھا اور بعد میں 24 دسمبر کو شکیب اور ان کی کمپنی کے 3 دیگر عہدیداروں کے خلاف مقدمہ دائر کیا تھا۔
 جنوری میں عدالت نے اس کیس میں شکیب کے وارنٹ گرفتاری جاری کیے تھے،ان پر تین لاکھ ڈالرز سے زیادہ کے چیک باؤنس ہونے کے دھوکہ دہی کے الزامات کے تحت مقدمہ چلایا جا رہا ہے۔
خیال رہے کہ شکیب الحسن سیاسی بدامنی اور عوامی لیگ کے ساتھ وابستگی کے باعث جان سے مارنے کی دھمکیاں ملنے کے بعد بنگلا دیش سے باہر ہیں۔
وہ مظاہروں کے دوران پولیس کریک ڈاؤن کی میں مارے جانے والے افراد کی ہلاکت کی تحقیقات کا سامنا کررہے ہیں۔